საქართველო, 10 აპრილი, საქინფორმი. საქართველოს მთავრობის მეთაურის განცხადებით, რომელიც მან მედიის წარმომადგენლებთან დღევანდელი შეხვედრისას გააკეთა, სამხედრო აღლუმი 26 მაისს არ უნდა ჩატარდეს, თუმცა, მისივე განმარტებით, საკითხი საბოლოოდ 12 აპრილს, თათბირზე გადაწყდება.

„ალბათ, სამხედრო აღლუმისგან თავს შევიკავებთ. ჩემი დამოკიდებულება ასეთია - ჩვენ არ ვართ ის ქვეყანა, რომ სამხედრო ძალა ვაჩვენოთ... ჩვენ გვაქვს ძალიან კარგი სამხედრო შეიარაღება, სხვა თემაა, რომ ძალიან ცუდად გამოიყენეს ეს 2008 წლის აგვისტოში... ჩანდა, რომ მაგარი მომზადებულები იყვნენ, მაგრამ სამხედრო ძალით ვერ დავიკვეხნით. ვფიქრობ, რომ ეს საჭირო არაა, მაგრამ არ მინდა, ეს პირადად გადავწყვიტო... მინდოდა, რომ 26 მაისი დღესასწაული ყოფილიყო არა მარტო თბილისის - საქართველოსიც. რაც გვყავს გასართობი ჯგუფები, დავანაწილებდით და კარგი იქნებოდა, თუ რამდენიმე რეგიონში აღინიშნებოდა დღესასწაული", - განაცხადა პრემიერმა.