სამართალი
წულუკიანი: „პრეზიდენტი და მისი ბევრი მაღალჩინოსანი დაიკითხება“
საქართველო, 9 აპრილი, საქინფორმი. საქართველოს აქვს ვალდებულება, გამოიძიოს აგვისტოს ომი - ამის შესახებ გუშინ ჟურნალისტებთან შეხვედრისას იუსტიციის მინისტრმა თეა წულუკიანმა განაცხადა. მისი განმარტებით, ჰააგის სასამართლოში პროკურორის სახელზე შეტანილია არაერთი განცხადება, სადაც სხვადასხვა არასამთავრობო ორგანიზაციის წარმომადგენლები, მოქალაქეები სხვადასხვა ქვეყნიდან ჩივიან იმაზე, რომ აგვისტოს ომის დროს ამა თუ იმ თანამდებობის და ეთნიკური წარმოშობის პირებმა ჩაიდინეს დანაშაული, რომელიც კაცობრიობის წინააღმდეგაა მიმართული და ომის დანაშაულად შეიძლება კვალიფიცირდეს.
იუსტიციის მინისტრის თქმით, მისი და მთავარი პროკურორის მიზანია, ეს საქმე არ იქცეს საერთაშორისო ტრიბუნალის განხილვის საგნად და აგვისტოს ომი საქართველოში გამოიძიონ.
„ჩემი და მთავარი პროკურორის მიზანია, რომ აგვისტოს ომი გამოვიძიოთ ჩვენ თვითონ. მაგრამ თუ ეს ვერ შევძელით და არ აღმოვჩნდით საკმარისად პროფესიონალები, ან არ გვექნა საკმარისი პოლიტიკური ნება ამისთვის, მაშინ იძულებული ვიქნებით, დავემორჩილოთ ჰააგის პროცესს და ეს საქმე წავიდეს საერთაშორისო დონეზე განხილვის რეჟიმში“, - აღნიშნა წულუკიანმა და დასძინა, რომ გამოძიება ყველა მიმართულებით უნდა წარიმართოს, რათა დაიდოს სრული სურათი იმისა, თუ რა გააკეთა წინა ხელისუფლებამ. მისი განცხადებით, ეს გულისხმობს ამჟამინდელი პრეზიდენტის - რომელიც დაკითხვის მომენტში შეიძლება უკვე აღარ იყოს პრეზიდენტი - და მისი ძალიან ბევრი მაღალჩინოსნის დაკითხვას.
