საქართველო, 4 აპრილი, საქინფორმი. სააკაშვილის გარემოცვას ევროპაში მცხოვრები ჩეჩნები საქართველოში ჩაჰყავდა და ამზადებდა, რათა შემდეგ მათი ჩრდილოეთ კავკასიაში გადასროლა მომხდარიყო. ეს სენსაციური განცხადება "პირველი რადიოსათვის" მიცემულ ექსკლუზიურ ინტერვიუში, ჩეჩენმა საველე მეთაურმა ახმედ ზაკაევმა გააკეთა. ზაკაევის თქმით, უახლოეს მომავალში დევნილობაში მყოფი ე.წ. იჩქერიის მთავრობა გამოაქვეყნებს დასკვნას ლაფანყურის სპეცოპერაციის შესახებ. "ლაფანყურის სპეცოპერაციის დროს გარდაიცვალა და მოკლეს რამდენიმე ჩეჩენი მებრძოლი. ამ ინფორმაციის გავრცელებისთანავე ჩვენმა მთავრობამ გამოსცა ბრძანება, რათა მომხდარიყო ამ ინციდენტის გამოძიება. კომისიამ მუშაობა თითქმის დაასრულა, დოკუმენტი მალე გახდება საჯარო", - განაცხადა ინტერვიუში ახმედ ზაკაევმა.

თავის მხრივ, ყოფილი თავდაცვის მინისტრი დიმიტრი შაშკინი ლაფანყურის სპეცოპერაციასთან დაკავშირებით ახმედ ზაკაევის განცხადებაზე კომენტარისგან თავს იკავებს. ამის შესახებ დიმიტრი შაშკინმა „პირველი რადიოს“ პრესკლუბში განაცხადა.

„თუ გვინდა დავრწმუნდეთ, რომ ეს სიმართლეს შეესაბამება და არ არის კიდევ ერთი პროვოკაცია, ჯერ უნდა შევისწავლოთ, დაველოდოთ ზაკაევის ოფიციალურ განმარტებას და შემდეგ ვისაუბროთ. ჩეჩნეთის მხარეს ლაფანყურის სპეცოპერაციის შესახებ ჰქონდა აბსოლუტურად სხვა განცხადება გაკეთებული“, - განმარტა შაშკინმა.

ყოფილი თავდაცვის მინისტრს იმედი აქვს, რომ საქართველოში მიმდინარე გამოძიება ყველა კითხვას პასუხს გასცემს.