საქართველო, 4 აპრილი, საქინფორმი. თბილისში დევნილთა კომპაქტურად ჩასახლების რამდენიმე ობიექტზე დაგროვილ ელექტროენერგიისა და ბუნებრივი აირის გადასახადს მთავრობა დაფარავს. როგორც ლტოლვილთა და განსახლების მინისტრმა დავით დარახველიძემ მთავრობის სხდომის დაწყებამდე  განუცხადა ჟურნალისტებს, შესაბამის საკითხს დღევანდელ სხდომაზე განიხილავენ.

მისივე განმარტებით, აღნიშნული დავალიანების დასაფარად მთავრობის სარეზერვო ფონდიდან დაახლოებით ნახევარი მილიონი ლარის გამოყოფა იგეგმება. ამჟამად ლაპარაკია ბაქოს ქუჩაზე და თბილისის ზღვის დასახლებაში მდებარე ობიექტებზე, ხოლო მომავალში სამინისტრო კიდევ 12 ობიექტში ჩასახლებული იძულებით გადაადგილებული პირებისთვის დავალიანების დაფარვის საკითხს განიხილავს.