საქართველო, 2 აპრილი, საქინფორმი. საქართველოს სახალხო დამცველის უჩა ნანუაშვილის მიერ პარლამენტისათვის წარდგენილი 2012 წლის ანგარიშის მიხედვით, თავდაცვის ყოფილი მინისტრის ბაჩო ახალაიას მიმართ ადგილი ჰქონდა კანონდარღვევას საქართველოს მთავარი პროკურატურის ანტიკორუფციული დეპარტამენტის განსაკუთრებით მნიშვნელოვან საქმეთა გამომძიებლის კ. კ.-ს მხრიდან.

მოწმეთა დაკითხვის ოქმების შესწავლის შედეგად დადგინდა, რომ გამომძიებელი კ. კ. ბაჩანა ახალაიას წინააღმდეგ წარმოებულ სისხლის სამართლის საქმეზე 2013 წლის 8 იანვარს 15:05 საათიდან 15:25 საათამდე აწარმოებდა მოწმე ვ. ბ.-ს დაკითხვას, ხოლო იმავე დღეს 15:00 საათიდან – 15:15 საათამდე, იმავე საქმის ფარგლებში, იგივე გამომძიებელი კითხავდა მოწმე ნ. ქ.-ს.

„საქართველოს კანონმდებლობა მოწმეების ერთად დაკითხვას გამორიცხავს. ხოლო თუ ამ ორი მოწმის დაკითხვა ერთად არ მიმდინარეობდა, მაშინ დაისმის კითხვა, თუ როგორ განახორციელა ერთმა გამომძიებელმა ერთდროულად ორი მოწმის ცალ-ცალკე დაკითხვა“, - აცხადებს უჩა ნანუაშვილი.