საქართველო, 1 აპრილი, საქინფორმი. საერთაშორისო უსაფრთხოების მხარდამჭერი ძალების (ISAF) სარდალი და ავღანეთში აშშ-ის ძალების მეთაური, გენერალი ჯოზეფ დანფორდი ერთდღიანი ვიზიტით ქართულ ბაზა “შუკვანს“ ეწვია. თავდაცვის სამინისტროს ინფორმაციით, ISAF-ის სარდალს III ქვეითი ბრიგადის მე-12 ბატალიონის ხელმძღვანელობამ ბაზის ტერიტორია დაათვალიერებინა და სამეთაურო ბრიფინგი ჩაუტარა.

მე-12 ბატალიონის მეთაურმა, მაიორმა კობა ცინდელიანმა გენერალ დანფორდს ქართული დანაყოფების ოპერაციის რაიონში არსებული სიტუაცია აუხსნა და 6 თვის განმავლობაში მიღწეული შედეგებიც გააცნო. ქართული ბატალიონის მეთაურის თქმით, ქართველი სამხედროების მიერ ჩატარებული ოპერაციების შედეგად კვლავ შესაძლებელი გახდა კოალიციური ძალების კონტროლის აღდგენა  იმ ტერიტორიებზე, სადაც ბოლო პერიოდში ამბოხებულები დომინირებდნენ.

როგორც თავდაცვის სამინისტრო იუწყება, შეხვედრის დასრულების შემდეგ გენერალმა დანფორდმა აღნიშნა, რომ მე-12 ბატალიონი საკმაოდ კარგად ართმევს თავს აშშ-ის საზღვაო ქვეითებთან და ადგილობრივ ძალებთან ურთიერთობას. „ქართული დანაყოფების კონტრიბუცია ავღანეთის მისიაში განსაკუთრებულია. პირადად მე ქართველებთან სამსახურმა  პირველად ჯერ კიდევ 1996 წელს მომიწია, როცა ჩრდილოეთ კაროლინაში სამხედრო ბაზაზე ბატალიონს ვმეთაურობდი. ჩვენი პარტნიორობა 20 წელიწადზე მეტია გრძელდება. ქართველი სამხედროების ღვაწლი  “სამხრეთ-დასავლეთის“ რეგიონული სარდლობის მიმართ ნამდვილად დასაფასებელია. ქართველი სამხედროები მამაცები და საქმეში კომპეტენტურები არიან, ისინი მაღალი პროფესიონალიზმით გამოირჩევიან. ამ თვისებების გამო აშშ-ს საზღვაო ქვეითებს გვეამაყება, რომ გვაქვს შესაძლებლობა, ვიმსახუროთ ქართველთა გვერდით“, – განაცხადა გენერალმა დანფორდმა.