პოლიტიკა
ბურჯანაძე: „სააკაშვილს აწუხებდა, რომ მე ყოველთვის პროქართული პოზიციის ერთადერთი ადამიანი ვიყავი“
საქართველო, 29 მარტი, საქინფორმი. პარლამენტის ექს-თავმჯდომარემ, პარტია „დემოკრატიული მოძრაობა – ერთიანი საქართველოს“ ლიდერმა ნინო ბურჯანაძემ ახალი ხელისუფლების შემდეგ ქვეყანაში განხორციელებულ პოზიტიურ ცვლილებებზე და დასავლეთის მხრიდან გაკეთებულ უარყოფით პოლიტიკურ შეფასებებზე მედიასთან გამართულ შეხვედრებზე ისაუბრა. მისი თქმით, ამნისტიას და ქვეყანაში შიშის სინდრომის გაქრობას საზოგადოებისთვის პოზიტიური დატვირთვა აქვს: „დღეს საზოგადოებაში შიშის სინდრომი, რომელიც არსებობდა „ნაციონალური მოძრაობის“ ხელისუფლებაში ყოფნის დროს, აბსოლუტურად მოისპო“.
ნინო ბურჯანაძის თქმით, დასავლელი პარტნიორების მხრიდან გაკეთებული განცხადებების განეიტრალება იმ გახმაურებული საქმეების ობიექტური გამოძიებით არის შესაძლებელი, რომლებიც დღესაც აღელვებს საქართველოს მოსახლეობას.
„თუ გამოძიებული იქნება 26 მაისის ფაქტები, გარწმუნებთ, რომ „ნაციონალური მოძრაობის“ პოლიტიკური ელიტა, მისი დღევანდელი გენერალური მდივანი, ბატონი ვანო მერაბიშვილი, მიხეილ სააკაშვილი და ძალიან ბევრი სხვა ადამიანი, უბრალოდ, აღმოჩნდებიან, რა თქმა უნდა, არა პოლიტიკური დევნის ობიექტები, არამედ სისხლის სამართლის დამნაშავენი, რომლებმაც პასუხი უნდა აგონ“.
როგორც ბურჯანაძემ პრესკონფერენციაზე განაცხადა, ის მალე წარმოადგენს დოკუმენტაციას, თუ როგორ არ უნდოდა სააკაშვილს რუსეთთან ურთიერთობების დალაგება და როგორ დაბლოკა მან გერმანიის კანცლერ მერკელის წინადადება, რომ პრობლემები მისი აქტიური მონაწილეობით ყოფილიყო მოგვარებული. მისი თქმით, ეს ქმედება მოჰყვა ბურჯანაძე-პუტინის შეხვედრას, რომლის შემდეგაც „პუტინმა განაცხადა, რომ „შესაძლებელია აფხაზურმა და ქართულმა, ოსურმა და ქართულმა მხარეებმა შეთანხმებას მიაღწიონ და მე მათ საქმეში არ ჩავერევი“. სააკაშვილმა კი შეთხზა მითები ჩემი პრორუსული ორიენტაციის შესახებ, – განაცხადა ბურჯანაძემ. –ამ მასალით გამოჩნდება, რომ სააკაშვილს ის კი არ აწუხებდა, რომ ბურჯანაძე თურმე პრორუსული იყო, სააკაშვილს აწუხებდა ზუსტად ის, რომ მან ძალიან კარგად იცოდა, რომ მე ყოველთვის პროქართული პოზიციის ერთადერთი ადამიანი ვიყავი“.
