პოლიტიკა
მაჭავარიანი: „ხელისუფლება თბილისის მერის უფლებამოსილებას ვერ შეზღუდავს“
საქართველო, 29 მარტი, საქინფორმი. პარტია „ნაციონალური მოძრაობის“ ერთ-ერთი ლიდერის, მიხეილ მაჭავარიანის, განცხადებით, რომელიც მან „პრაიმ თაიმის“ პრესკლუბში გააკეთა, „საქართველოს დედაქალაქის – თბილისის შესახებ“ კანონში ცვლილების შეტანა იგეგმება, რომლის მიხედვითაც ,თბილისის მერის უფლებამოსილებები საკრებულოზე გადავა. მაჭავარიანის თქმით, გამგებლებსა და სამსახურების უფროსებს საკრებულო დანიშნავს.
როგორც მაჭავარიანმა განაცხადა, ამ ეტაპზე თბილისის ხელში ჩასაგდებად გადამწყვეტი ბრძოლა მიმდინარეობს.
„ახლა „ქართული ოცნებისთვის“ მთავარია, თბილისის საკრებულოში უმრავლესობა მოიპოვონ, ამის შემდეგ თბილისის მერს უფლებამოსილება შეუმცირონ“, – აღნიშნავს მიხეილ მაჭავარიანი. მისივე თქმით, მიუხედავად იმისა, რომ საპარლამენტო უმრავლესობა „ოცნების“ ხელშია, „ნაციონალური მოძრაობა“ ყველა მეთოდით იბრძოლებს და ხელისუფლება თბილისის მერის უფლებამოსილების შეზღუდვას ვერ შეძლებს. „არ აგიხსნით, რატომ ვერ გააკეთებენ, გინდათ, ვანგა ან ნოსტრადამუსი დამიძახეთ“, – განაცხადა მაჭავარიანმა.
