პოლიტიკა
უსუფაშვილი თურქეთის საგარეო საქმეთა მინისტრს შეხვდა
საქართველო, 28 მარტი, საქინფორმი. გუშინდელ შეხვედრაზე საქართველოს პარლამენტის თავმჯდომარე დავით უსუფაშვილმა და თურქეთის საგარეო საქმეთა მინისტრმა აჰმათ დავუთოღლუმ საქართველო-თურქეთის ურთიერთობის ყველა მიმართულება განიხილეს. შეხვედრაზე აღინიშნა, რომ ჩვენს ქვეყნებს შორის ურთიერთობა სწორი გზით ვითარდება, მხოლოდ ინვესტიციების მოცულობისა და ტემპების გაზრდაა საჭირო.
საქართველოს ახალი ხელისუფლება ახალი ენთუზიაზმით შეუდგა ნაცად მეგობართან და სტრატეგიულ პარტნიორთან ურთიერთობას. სტუმარმა აღნიშნა, რომ ჩვენი თანამშრომლობის განვითარებაში განსაკუთრებულ როლს ასრულებს ჯეიჰანის, ყარსისა და ერზრუმის პროექტები. მისი განცხადებით, დღეს გაიმართება სამმხრივი შეხვედრა საქართველოს, თურქეთისა და აზერბაიჯანის დელეგაციებს შორის, სადაც ეს საკითხები კიდევ უფრო დეტალურად განიხილება. შეხვედრაზე საუბარი შეეხო ქართული კულტურის ძეგლების აღდგენის საკითხსაც და ითქვა, რომ ქვეყნებს შორის ურთიერთობა მხოლოდ მაშინ არის შესაძლებელი, როდესაც ორივე სახელმწიფო პატივს სცემს ერთმანეთის მოქალაქეების უფლებას, მათ თავისუფლებებს, მათ შორის, რელიგიურ უფლებებს და თავისუფლებებს, ცნობილია რომ პრაქტიკულად მიღებულია გადაწყვეტილება ორი ძეგლის აღდგენის სამუშაოების დაწყებაზე, ასევე ბათუმში მეჩეთის აღდგენის თაობაზე. „შევთანხმდით იმაზე, რომ ჩვენი ურთიერთობის ყველა მიმართულებით – ეკონომიკური, კულტურული, სამხედრო, პოლიტიკური თანამშრომლობის კუთხით, ჩვენ ვართ სწორ გზაზე, მხოლოდ ტემპების და მოცულობის გაზრდაა საჭირო ინვესტიციებში, ეკონომიკაში. შევთანხმდით იმაზეც, რომ საქართველო დიდად აფასებს თურქეთის პოლიტიკას საქართველოს ტერიტორიული მთლიანობის ურღვევობასთან დაკავშირებით, ჩვენს მცდელობას ევროინტეგრაციულ პროცესებში, ევროპასთან ეკონომიკური ურთიერთობის დამყარებაში. ასევე თურქეთის მცდელობას, რომ საქართველო რაც შეიძლება სწრაფად გახდეს ნატოს წევრი და ამასთან დაკავშირებით ბატონმა მინისტრმა სხვა ევროპელ მინისტრებთან ერთად ცოტა ხნის წინ სპეციალური განცხადებაც გააკეთა“, – განაცხადა პარლამენტის თავმჯდომარემ დავით უსუფაშვილმა შეხვედრის დასრულების შემდეგ.
