საქართველო, 26 მარტი, საქინფორმი. იტალიაში საქართველოს ყოფილი ელჩი კოტე გაბაშვილი შვეიცარიის ელჩ  გიუნტერ ბეხლერის მიერ ბიძინა ივანიშვილისადმი მიწერილ წერილს გამოეხმაურა. მისი განცხადებით, რომელიც გაბაშვილმა „პირველი რადიოს“ პრესკლუბში გააკეთა, შეუძლებელია, ევროპის რომელიმე ელჩს ევროპის სახალხო პარტიის პოლიტიკა გაეკრიტიკებინა.

„შეუძლებელია, რომ ევროპის ერთ-ერთი ქვეყნის ელჩს გაეკრიტიკებინა სახალხო პარტია. ეს არის ყველაზე დიდი ევროპული გაერთიანება, ეს არის მემარჯვენე, კონსერვატიული პარტიების გაერთიანება და არ მგონია, რომელიმე ელჩს აეღო თავის თავზე ეს რისკი, რომ გაეკრიტიკებინა იმ წამყვანი პარტიების პოზიცია, რომელსაც თვითონვე ეკუთვნის. აქ რაღაც გაუგებრობაა“, – აღნიშნა გაბაშვილმა, რომელმაც, ასევე, ისაუბრა საქართველოს მთავრობასა და ევროპის სახალხო პარტიას შორის მიმოწერებზე და ისინი უარყოფითად შეაფასა, რადგან, მისი აზრით, ამგვარი მიმოწერა საქართველოს მიმართ მხოლოდ უარყოფით განწყობას ჩამოაყალიბებს.

საქინფორმის მკითხველს შევახსენებთ, რომ შვეიცარიის ელჩმა საქართველოში გიუნტერ ბეხლერმა საქართველოს პრემიერ-მინისტრ ბიძინა ივანიშვილს ღია წერილი მისწერა, სადაც აღნიშნა, რომ საქართველო ბევრად უფრო თავისუფალია, ვიდრე ოდესმე ყოფილა ანდა  ვიდრე მისი მეზობელი ქვეყნები არიან.