საზოგადოება
დაჭრილ ვეტერანებს თავდაცვის სამინისტრო დაასაქმებს
საქართველო, 26 მარტი, საქინფორმი. თავდაცვის მინისტრი ირაკლი ალასანია ISAF-ის მისიის დროს დაშავებულ სამხედრო მოსამსახურეებს შეხვდა. თავდაცვის სამინისტროში გამართულ შეხვედრას ესწრებოდნენ საქართველოს შეიარაღებული ძალების გაერთიანებული შტაბის უფროსი, პოლკოვნიკი ირაკლი ძნელაძე და მისი მოადგილეები – პოლკოვნიკი ლაშა ბერიძე და პოლკოვნიკი ვლადიმერ ჩაჩიბაია. შეხვედრაზე მინისტრმა სიტყვით მიმართა სამხედრო მოსამსახურეებს. მან მადლობა გადაუხადა საერთაშორისო უსაფრთხოებისთვის მათ მიერ საკუთარი ჯანმრთელობის ფასად გაღებული წვლილის გამო, რომლის მიუხედავად, ისინი კვლავ აგრძელებენ საქართველოს სამსახურში ვაჟკაცურად დგომას.
როგორც მინისტრმა აღნიშნა, ავღანეთის მისიის დროს დაშავებული სამხედრო მოსამსახურეების ინტეგრირება შეიარაღებულ ძალებში კიდევ უფრო გააქტიურდება.
„განსაკუთრებული მნიშვნელობა აქვს, რომ მათ ჰქონდეთ განცდა, რომ არიან ჯარის განუყოფელი ნაწილი, ჩვენი საერთო ოჯახის განუყოფელი ნაწილი. ჩვენ ინდივიდუალურად საუბარი გვაქვს, თუ როგორ დასაქმდებიან ისინი თავდაცვის სამინისტროში. მათ ჯანმრთელობა შეწირეს ქვეყნის უსაფრთხოებას და ყველა საბრძოლო ამოცანას, გარკვეულწილად, ვეღარ შეასრულებენ, მაგრამ აუცილებლად მოინახება მათთვის ადგილი სხვა დანიშნულებით, რომელიც თვითრეალიზაციის საშუალებას მისცემს ჯარისკაცს. მნიშვნელოვანია, რომ მათი ოჯახის წევრებსაც ანალოგიურრი განცდა ჰქონდეთ, ამიტომ ჩვენ ოჯახის პროგრამასაც ვადგენთ“, – აღნიშნა შეხვედრაზე ალასანიამ.
