საზოგადოება
დეპუტატები, რომლებიც საკონსტიტუციო ცვლილებების კენჭისყრას არ დაესწრნენ
საქართველო, 22 მარტი, საქინფორმი. „ნეტგაზეთის“ მიერ გავრცელებული ცნობით, საქართველოს პარლამენტმა „ნეტგაზეთს“ მიაწოდა იმ დეპუტატების სია, რომლებიც არ ესწრებოდნენ 21 მარტის სხდომას, როდესაც საკანონმდებლო ორგანომ საკონსტიტუციო ცვლილებები პირველი მოსმენით დაამტკიცა.
ეს დეპუტატები არიან მარიკა ვერულაშვილი (დამოუკიდებელი დეპუტატი), გოგი თოფაძე („ქართული ოცნება“) და „ნაციონალური მოძრაობიდან“ 11 დეპუტატი: პეტრე ცისკარიშვილი, გიორგი ოჩიაური, ნიკოლოზ ყიფშიძე, აზერ სულეიმანოვი, მიხეილ მახარაძე, ზაზა კედელაშვილი, სამველ პეტროსიანი, გიორგი კანდელაკი, გიორგი (გივი) თარგამაძე, ჩიორა თაქთაქიშვილი და როლანდ ახალაია.
ჩამოთვლილი დეპუტატებიდან ორი – ჩიორა თაქთაქიშვილი და გიორგი კანდელაკი 21 მარტის ჩათვლით საფრანგეთში მივლინებით იმყოფებოდნენ. მიზეზები, თუ რატომ არ ესწრებოდნენ სხვა დეპუტატები სხდომას გუშინ, უცნობია.
პრესსამსახურის მიერ მოწოდებული ინფორმაციით, გუშინდელ კენჭისყრაში 134-მა დეპუტატმა მიიღო მონაწილეობა, თუმცა ტაბლოზე 21 მარტს, კენჭისყრის შედეგებში მითითებული იყო, რომ საკონსტიტუციო ცვლილებებს 135 დეპუტატმა 0-ის წინააღმდეგ დაუჭირა მხარი.
