საქართველო, 22 მარტი, საქინფორმი. პარლამენტის ბიურომ დღევანდელი პლენარული სხდომის დღის წესრიგზე იმსჯელა. ბიუროს წევრებმა დღის წესრიგში დამატებით რამდენიმე საკითხი შეიტანეს, მათ შორის, საქართველოს კონსტიტუციური კანონის პროექტის – „საქართველოს კონსტიტუციაში ცვლილების შეტანის შესახებ“, II მოსმენით განხილვა.

კანონპროექტის თანახმად, საქართველოს პარლამენტის დათხოვნის შეუძლებლობის ერთ-ერთ საფუძვლად, ნაცვლად საქართველოს პრეზიდენტის უფლებამოსილების ვადის ბოლო 6 თვისა, განისაზღვრება საქართველოს პრეზიდენტის უფლებამოსილების ვადის ამოწურვის კალენდარული წლის მაისის თვიდან ახალარჩეული პრეზიდენტის მიერ ფიცის დადებამდე პერიოდი. საქართველოს პრეზიდენტი გადამდგარ ან გადაყენებულ მთავრობას დააკისრებს მოვალეობათა შესრულებას ახალი მთავრობისათვის ნდობის გამოცხადებამდე; ხოლო საქართველოს მთავრობისა და სამთავრობო პროგრამისათვის ზედიზედ სამჯერ ნდობის მიუღებლობისას, თუკი არსებობს პარლამენტის დათხოვნის შეუძლებლობის კონსტიტუციით გათვალისწინებული გარემოებები, პრეზიდენტი პარლამენტს დაითხოვს შესაბამისი გარემოების ამოწურვიდან 3 დღის ვადაში. დეპუტატები გეგმავენ, რომ დღეს პლენარულ სხდომაზე სამოცამდე საკითხი განიხილონ და კენჭი უყარონ.