საქართველო, 22 მარტი, საქინფორმი. პარლამენტში საკონსტიტუციო ცვლილებების პირველი მოსმენით მიღებას გუშინ ქვეყნის მეთაური გამოეხმაურა. მიხეილ სააკაშვილის თქმით, იგი მზად არის ხალხთან ერთად ბოლომდე საბრძოლველად.

„ყველანაირი მცდელობა, რომ მე გამიყვანონ პოლიტიკური ბრძოლიდან ახლა ან მომავალ წლებში, არ გამოგივათ, იმიტომ, რომ მე ვიქნები ერთ-ერთ მებრძოლი იმ ბრძოლაში, რომელსაც დემოკრატიისა და განვითარების საბოლოოდ დამკვიდრება და გაგრძელება ჰქვია. მე მინდა, ვუთხრა ხალხს, გულს ნუ გაიტეხთ, ჩვენი ბრძოლა გრძელდება და დღეს ვაჩვენეთ, რომ ძალიან ბრძოლისუნარიანები ვართ. ჩვენ ჩვენს ბრძოლას გავაგრძელებთ, მე თქვენთან ერთად ამ ბრძოლას გავაგრძელებ. პრეზიდენტის რანგში, თუ პრეზიდენტის რანგის გარეშე, მანამ, სანამ საქართველოს ხელახლა გადარჩენის საკითხი დგას“, – აღნიშნა სააკაშვილმა და იქვე დასძინა, რომ საქართველო არ არის რუსეთი და საქართველოში სხვა მეთოდები და დემოკრატიული დიალოგია საჭირო.

„დღეს პრემიერმა ივანიშვილმა პირველად იხილა საკუთარი თვალით, რომ მისი მცდარი წარმოდგენა, რომ ყველაფერი ფულზე იყიდება ან თუ ფულზე არ იყიდება, 90-იანი წლების ყაჩაღური რუსული მეთოდები ყოველთვის მოქმედებს, საქართველოში „ვარდების რევოლუციის“ შემდეგ საზოგადოების ყველაზე ჯანსაღ, დემოკრატიულ ნაწილზე და, მათ შორის, პოლიტიკური სპექტრის ამ წარმომადგენლებში, არ მოქმედებს“, – განაცხადა ქვეყნის მეთაურმა.

მისივე თქმით, „ნაციონალური მოძრაობა“ თავის პოზიციებს ბოლომდე გაიტანს.