საქართველო, 20 მარტი, საქინფორმი. გუშინ საფრანგეთში საქართველოს ინტერპოლის ეროვნული ცენტრალური ბიუროს მიერ მიწოდებული ოპერატიული ინფორმაციის საფუძველზე, საფრანგეთის სამართალდამცავი ორგანოების მიერ დაკავებულ იქნა თბილისის ინტერპოლის მიერ წითელი ცირკულარით საერთაშორისო ძებნილი ვახტანგ ნოეს ძე გვრიტიშვილი, რომელსაც ბრალად ედება სსსკ 133-ე მუხლით, 104-ე მუხლის მე-4, მე-6, მე-7 პუნქტებითა და 179-ე მუხლის მე-3 ნაწილის „ბ“ და „გ“ ქვეპუნქტებით გათვალისწინებული დანაშაულების ჩადენა, რაც გულისხმობს ადამიანის გატაცებას – ჩადენილს ანგარებით; ყაჩაღობას – წინასწარი შეთანხმებით პირთა ჯგუფის მიერ; ბინაში შეღწევით თავდასხმას – მოქალაქის პირადი ქონების დაუფლების მიზნით, რასაც თან ერთვის სიცოცხლისა და ჯანმრთელობისთვის საშიში ძალადობა; დამამძიმებელ გარემოებებში ორი ან მეტი ადამიანის განზრახ მკვლელობას, ჩადენილს განსაკუთრებული სისასტიკითა და ისეთი საშუალებით, რომელიც საშიშროებას წარმოადგენს მრავალი ადამიანის სიცოცხლისთვის, სხვა დანაშაულის დაფარვის მიზნით.

1994 წლის იანვარში ვახტანგ გვრიტიშვილმა თანამზრახველებთან ერთად მოახდინა ნეშან მინასიანის შვილის, ვაზგენ მინასიანის გატაცება, ფულის გამოძალვის მიზნით. ვაზგენ მინასიანი მოგვიანებით გათავისუფლებული იქნა მშობლების მიერ, 75 000 აშშ დოლარის გადახდის შედეგად. იმავე წლის თებერვალში დამნაშავეებისთვის ცნობილი გახდა, რომ ნეშან მინასიანმა შეიტყო მისი შვილის გამტაცებლების ვინაობის შესახებ და კვალის დაფარვის მიზნით, ვ. გვრიტიშვილი თანამზრახველებთან ერთად, 1994 წლის 19 თებერვალს, ყაჩაღურად თავს დაესხა მინასიანების ოჯახს და ცეცხლსასროლი იარაღიდან გასროლით მოკლა ნეშან მინასიანი, ფლორა მინასიანი და ვაზგენ მინასიანი, ხოლო ამ უკანასკნელის დამ – გაიანე მინასიანმა მიიღო ჯანმრთელობის დაზიანება.

2011 წლის 15 სექტემბრის თბილისის საქალაქო სასამართლოს განჩინებით, ვახტანგ გვრიტიშვილს აღმკვეთი ღონისძიების სახით შეეფარდა პატიმრობა, ხოლო 2011 წლის 3 ნოემბრიდან იგი წითელი ცირკულარით იძებნებოდა თბილისის ინტერპოლის მიერ.