საქართველო, 15 მარტი, საქინფორმი. აგრუნის სტუდენტების საპროტესტო მოთხოვნა უცვლელია – ავტორიზაციის აღდგენა. განათლების მინისტრი გიორგი მარგველაშვილი უნივერსიტეტის მფლობელ კახა ბენდუქიძეს ხარვეზების გამოწორებას სთხოვს, სტუდენტებს კი შეთავაზებით მიმართავს: ხარვეზების აღმოუფხვრელობის შემთხვევაში ახალგაზრდებს ტექნიკურ უნივერსიტეტში უფასოდ სწავლა შეეძლებათ. საპროტესტო გამოსვლების ორგანიზატორები შეთავაზებას არ იღებენ.

მარგველაშვილი სტუდენტებს მოუწოდებს, არ გახდნენ ბენდუქიძის პოლიტიკური მძევლები. მისი თქმით, ტექნიკურ უნივერსიტეტში იქნება ალტერნატიული ბაზა იმისთვის, რომ თუ ბენდუქიძე გააგრძელებს უმანკო შეურაცხყოფილის თამაშს და სტუდენტები ეყოლება მძევლად, მათ ჰქონდეთ სხვა ალტერნატივა: „თუ თქვენ მაინც გააგრძელებთ ბენდუქიძის პოლიტიკურ მძევლობას და მიჰყვებით მას თავის ბინძურ პოლიტიკურ თამაშებში – სუფთა თამაში მას ცხოვრებაში არ უთამაშია, მე მაინც ვიზრუნებ თქვენზე. მე უკვე ვმუშაობ იმაზე, რომ ბევრად უკეთესი მატერიალურ-ტექნიკური ბაზა შეიქმნას ტექნიკურ უნივერსიტეტში და მეტიც, იქ სწავლა იქნება უფასო“.

მინისტრის განმარტებით, კახა ბენდუქიძე უნდა დაემორჩილოს საქართველოს კანონმდებლობას და გააკეთოს შესაბამისი შინაგანაწესი.

მისივე თქმით, აგრარული უნივერსიტეტი არ დახურულა – ავტორიზაციის შეჩერების შესახებ ბრძანება 4 თვეში შედის ძალაში.