სამართალი
სამეგრელოში მომხდარი მკვლელობა გაიხსნა
საქართველო, 12 მარტი, საქინფორმი. შსს-ის ინფორმაციით, სამეგრელო-ზემო სვანეთის სამხარეო მთავარი სამმართველოს თანამშრომლებმა, ცხელ კვალზე ჩატარებული ოპერატიულ-სამძებრო და საგამოძიებო ღონისძიების შედეგად, განზრახ მკვლელობის ბრალდებით 1959 წელს დაბადებული ხვიჩა ბ. დააკავეს.
ბრალდებულმა ზუგდიდის რაიონის სოფელ ნარაზენში ურთიერთშელაპარაკების ნიადაგზე თანასოფლელ სულიკო ბერიშვილს გულმკერდის არეში დანით სასიკვდილო ჭრილობა მიაყენა და შემთხვევის ადგილიდან მიიმალა.
სამართალდამცველებმა ბრალდებული ცხელ კვალზე ჩატარებული სამძებრო ღონისძიებების შედეგად მომხდარიდან რამდენიმე საათში სენაკში დააკავეს. დანაშაულის იარაღს – დანას – დაკავებულის საცხოვრებელი სახლის ეზოს ჩხრეკისას მიაკვლიეს.
გამოძიებას სამეგრელო-ზემო სვანეთის სამხარეო მთავარი სამმართველო საქართველოს სსკ-ის 108-ე მუხლით აწარმოებს. ჩადენილი დანაშაული 7-დან15 წლამდე თავისუფლების აღკვეთას ითვალისწინებს.
