საქართველო, 12 მარტი, საქინფორმი. თბილისის კონსერვატორიის დიდ დარბაზში რუსეთის სახალხო არტისტის, ცნობილი მუსიკოსის, დირიჟორისა და ალტისტის – იური ბაშმეტის –  კონცერტმა აქციის ფონზე ჩაიარა. კონსერვატორიის წინ შეკრებილები აპროტესტებდნენ იმ ფაქტს, რომ 2008 წელს იური ბაშმეტმა დამოუკიდებლობა მიულოცა აფხაზებსა და ოსებს.

აქციის მონაწილეთა განმარტებით, „ბაშმეტი არის, კონკრეტულად, ქართული კანონმდებლობით დამნაშავე და ვითხოვთ, ირაკლი ღარიბაშვილმა და შინაგან საქმეთა სამინისტრომ მოახდინოს რეაგირება ქართული კანონმდებლობით. ეს ადამიანი, რომელმაც 2008 წელს აფხაზეთსა და სამხრეთ ოსეთს მიულოცა დამოუკიდებლობა და უკონცერტა, დღეს იმყოფება ქართულ სცენაზე“.

თავად მუსიკოსმა კი კონცერტის შემდეგ განაცხადა, რომ ის ომის წინააღმდეგია და მისი, როგორც მუსიკოსის, საქმე დაკვრაა: „კონცერტის მსვლელობისას დარბაზში ხმაური შემოდიოდა. არ ვიცი, ვინ ხმაურობდა. აქ წლებია, არ ვყოფილვარ. არასდროს ვყოფილვარ ომის მხარდამჭერი, მაჩვენეთ რაიმე დოკუმენტი ან სტატია, სადაც მე მსგავსი პოზიცია მაქვს. მე მუსიკოსი ვარ და ჩემი საქმეა დაკვრა. მე ომის წინააღმდეგი ვარ. ვთვლი, რომ კავკასია უნდა იყოს თავისუფალი და მშვიდი“.