საქართველო, 12 მარტი, საქინფორმი. დღეს, 18:30 საათზე, რუსთაველის გამზირზე, ანსამბლ „ერისიონის“ ოფისთან, დევიზით – „ნუ უცეკვებ ოკუპანტს“, გაიმართება საპროტესტო აქცია, რომელშიც მონაწილეობას მიიღებს საზოგადოების ნაწილი არასამთავრობო ორგანიზაციებთან ერთად. შესაბამისი შინაარსის განცხადება სოციალურ ქსელ „ფეისბუქში“ გამოჩნდა, სადაც ნათქვამია, რომ საქართველოსთვის ასეთი ქმედება პოლიტიკურად და ეკონომიკურად წამგებიანია.

„გვინდა, დავაფიქსიროთ, რომ ქვეყნის დეოკუპაციის და აფხაზეთისა და სამხრეთ ოსეთის აღიარების ანულირებამდე, სახელმწიფო პოლიტიკა არ უნდა იქნას შერბილებული ოკუპანტი ქვეყნის მიმართ, პოლიტიკურ, ეკონომიკურ, კულტურულ თუ სხვა საკითხებში.

ასეთი ქმედებები არავითარ შემთხვევაში არ აყენებს საქართველოს მომგებიან პოზიციაში არც პოლიტიკურად და არც მორალური თვალსაზრისით“, – აცხადებენ აქციის მონაწილენი.

საქინფორმის მკითხველს შევახსენებთ, რომ ანსამბლმა „ერისიონმა“ 9-10 მარტს მოსკოვში, კრემლის საკონცერტო დარბაზში, კონცერტი გამართა, რამაც ქართველი საზოგადოების არაერთგვაროვანი რეაქცია გამოიწვია.