საზოგადოება
ონიშჩენკო: „საქართველოს მეორე ინსპექტირების ოფიციალური თანხმობა არ მოუცია“
საქართველო, 11 მარტი, საქინფორმი. რუსეთის მთავარმა სანიტარიულმა ექიმმა გენადი ონიშჩენკომ რუსულ მედიასთან საუბარში აღნიშნა, რომ საქართველოს არ მოუცია ოფიციალური თანხმობა „როსპოტრებნადზორის“ ექსპერტთა მიერ იმ საწარმოთა მეორე ინსპექტირების ჩატარების თაობაზე, რომლებიც ღვინისა და მინერალური წყლის რუსულ ბაზარზე მიწოდებას აპირებენ.
„ჩვენ ვამზადებთ ინსპექციის მეორე ჯგუფს. უკვე განვაცხადეთ, რომ მზად ვართ, ჩავიდეთ საქართველოში 25 მარტს, თუმცა, ქართული მხარისგან პასუხი არ გვაქვს. არ ყოფილა არავითარი სიგნალი. ჩვენ უნდა შევათანხმოთ გადაადგილების მარშრუტი. ამ საკითხს ყველა კუთხით ვუდგებით, მათ შორის, ჩვენი ხალხის უსაფრთხოების თვალსაზრისითაც“, – აღნიშნა ონიშჩენკომ.
„ეს რუტინული პროცესია, ყველაფერი მათზეა დამოკიდებული“, – აცხადებს რუსეთის მთავარი სანიტარი.
საქინფორმის მკითხველს შევახსენებთ, რომ „როსპოტრებნადზორის“ ექსპერტთა პირველმა ჯგუფმა ქართული ღვინისა და მინერალური წყლების მწარმოებელი საწარმოების ინსპექტირება 25.02 – 01.03 პერიოდში განახორციელა და ღვინის მწარმოებელ 36 კომპანიას და მინერალური წყლების 4 საწარმოს, რომელთაც ინსპექტირება წარმატებით გაიარეს, შეუძლიათ ნიმუშების წარდგენა რუსეთის ბაზარზე რეგისტრაციისთვის.
