საქართველო, 5 მარტი, საქინფორმი. იტალიის ყოფილი პრემიერ-მინისტრის – სილვიო ბერლუსკონის, სახლი არასრულწლოვანთა მონაწილეობით სექსუალური ორგიების გამართვის ადგილს წარმოადგენდა. პროკურატურის განცხადებით, გოგონებს ინტიმური მომსახურების სანაცვლოდ პოლიტიკურ კარიერას ჰპირდებოდნენ. ამის შესახებ პროკურორმა სასამართლო პროცესზე განაცხადა, რომლის მიმდინარეობისასაც მთავრობის ექს-ხელმძღვანელი მაროკოელ მოცეკვავე არასრულწლოვან კარიმა მაჰრუტთან, მეტსახელად „რუბისთან“, სექსუალურ ურთიერთობაში დაადანაშაულეს.

„რუბი პროსტიტუციის სიტემის ნაწილი იყო არკორში, სადაც სილვიო ბერლუსკონი სექსუალურ ხასიათის ქმედებებისთვის ფულითა და სხვადასხვა პრივილეგიის მინიჭებით, კერძოდ, პროფესიული ზრდის, მათ შორის, პოლიტიკაში – დაპირებებით აჯილდოებდა“, –განაცხადა სასამართლოზე მილანის პროკურორმა ანტონიო სანჯერმანომ.

მაროკოელი მოცეკვავის ფსევდონიმმა სახელწოდება შესძინა სკანდალურ სასამართლო პროცესს, რომელსაც „რუბის საქმეს“ უწოდებენ.

პროკურორის თქმით, ზოგიერთ გოგონას ყოველთვიურად 2.5 ათასი ევროთი აჯილდოებდნენ.

ამავე დროს, კარიმა მაჰრუტმა განაცხადა, რომ ბერლუსკონისთან სექსი არ ჰქონია. ბერლუსკონის განცხადებით კი, როგორც ჩანს, პროკურორს ცხოვრებაში არ გაუმართლა, რადგან თავისი საზომით ზომავს, როცა მის წინააღმდეგ ბრალდებებს ახმიანებს.