საქართველო, 27 თებერვალი, საქინფორმი. გუშინ, 26 თებერვალს, მას შემდეგ, რაც სახელმწიფო დაცვის სპეციალური სამსახურის უფროსად პრემიერ ივანიშვილის დაცვის უფროსი ანზორ ჩუბინიძე დაინიშნა, რომელმაც წინა დღეს, 25 თებერვალს, სამსახურიდან გათავისუფლებული თეიმურაზ ჯანაშიას ადგილი დაიკავა, პრეზიდენტ სააკაშვილის პრესსპიკერმა მანანა მანჯგალაძემ საგანგებო ბრიფინგზე განაცხადა, რომ პრეზიდენტი სახელმწიფო დაცვის სამსახურზე უარს აცხადებს.

„მას შემდეგ, რაც გუშინ პრემიერ-მინისტრმა ერთპიროვნულად გაათავისუფლა სახელმწიფო დაცვის სპეციალური სამსახურის უფროსი თემურ ჯანაშია, ახლა დაცვით სარგებლობის სანაცვლოდ, პრეზიდენტს პირობად უყენებს კონსტიტუციის შეცვლის საკითხს. საქართველოს პრეზიდენტის სახელით, უფლებამოსილი ვარ, განვაცხადო, რომ საქართველოს პრეზიდენტი ამ პირობებში მხოლოდ ერთადერთ გამოსავალს ხედავს – მთლიანად უარი თქვას დაცვის სამსახურით სარგებლობაზე. მინდა, გაცნობოთ, რომ პრეზიდენტის დაცვის სპეციალური ღონისძიებები დღევნდელი დილიდან აღარ ხორციელდება. თუმცა, ქვეყნის პირველ პირს ეს ხელს ვერ შეუშლის ვერც გადაადგილებაში და ვერც, შესაბამისად, ხალხთან შეხვედრებში, რაც ბოლო კვირების განმავლობაში სისტემატურად ხდებოდა. ქვეყნის პირველი პირი მადლობას უხდის სახელმწიფო დაცვის ყველა იმ თანამშრომელს, რომელიც ამ წლების განმავლობაში მასთან ერთად იყო და პირნათლად ასრულებდა მასზე დაკისრებულ მოვალეობებს“, –განაცხადა მანანა მანჯგალაძემ.

საქინფორმის მკითხველს შევახსენებთ, რომ ჩუბინიძის დანიშვნასთან დაკავშირებით გუშინვე კომენტარი გააკეთა პარლამენტის თავმჯდომარე დავით უსუფაშვილმა, რომელმაც ჟურნალისტის შენიშვნაზე, რომ ოპონენტების განცხადებით, ეს დანიშვნა პოლიტიკური ხასიათისაა,  განაცხადა: „ამ სამსახურს თუ გუშინდლამდე მიხეილ სააკაშვილის პირადი დაცვის უფროსი ჯანაშია ხელმძღვანელობდა, ეს იყო სახელმწიფოებრივი გადაწყვეტილება და ეს დანიშვნა პოლიტიკურია?“ – აღნიშნა უსუფაშვილმა და დასძინა,  რომ სახელმწიფო დაცვის სამსახურს პროფესიონალმა უნდა უხელმძღვანელოს. „მე მაგალითად, მაგ საქმეში არ გამოვდგებოდი“, – განაცხადა მან.