საზოგადოება
„ქართულ ოცნებაში“ შიდაპარტიული საკითხები განიხილეს
საქართველო, 26 თებერვალი, საქინფორმი. გუშინდელ სხდომაზე „ქართული ოცნება – დემოკრატიული საქართველოს“ პოლიტსაბჭომ შიდაპარტიულ საკითხებსა და რაიონული ორგანიზაციების თავმჯდომარეების შესახებ იმსჯელა.
„დაფუძნების დღიდან რუსთავის ორგანიზაციაში ვმუშაობთ. წავედით ყველაფერზე, რაზე წასვლაც კი შეიძლებოდა. 1-ლი ოქტომბრის შემდეგ კი გამოჩნდნენ ადამიანები, რომლებიც სახეზე არ გვინახავს, ზოგიერთი „ნაციონალური მოძრაობის“ გამოკვეთილი წევრიც კი იყო. ისინი გვიმტკიცებენ, რომ „ქართული ოცნების“ წევრები არიან“, – აცხადებს „ქართული ოცნების“ წარმომადგენელი ანზორ ხუციშვილი.
პარლამენტის ვიცე-სპიკერ მურმან დუმბაძის განცხადებით, სტრუქტურის პირველად ვერსიაზე მუშაობა გრძელდება. პოლიტსაბჭო ერთ კვირაში კვლავ შეიკრიბება და იმსჯელებს რაიონული და ადგილობრივი სტრუქტურების სრულყოფაზე.რუსთავის ორგანიზაციის განცხადებები პარტიის პოლიტსაბჭომ გუშინ ჩაიბარა. პარლამენტის საპროცედურო საკითხთა კომიტეტის თავმჯდომარე ირინა იმერლიშვილის განმარტებით, რუსთავში პარტიული ორგანიზაციის დამფუძნებელი კონფერენციის გამართვის მცდელობა ორჯერ იყო, თუმცა, უშედეგოდ; ამავე პრობლემით დარჩენილია ხუთი ორგანიზაცია. პოლიტსაბჭო, ასევე, იმსჯელებს მათ მიერ გადმოცემული „ქართული ოცნების“ წევრობის მსურველთა განცხადებების შესახებ.
