პოლიტიკა
სესილია მალმსტრომი: „ვიზების ლიბერალიზაცია არის ძალიან მნიშვნელოვანი მიმართულება“
საქართველო 25 თებერვალი, საქინფორმი. დღეს, საგარეო საქმეთა სამინისტროში მაია ფანჯიკიძესთან ერთობლივ პრესკონფერენციაზე ევროკომისარმა საშინაო საკითხებში სესილია მალმსტრომმა განაცხადა, რომ საქართველო ვიზების ლიბერალიზაციის შეთანხმებას ყველა კრიტერიუმის დაკმაყოფილების შემდეგ მიიღებს, რაც ხელისუფლების ტემპებზეა დამოკიდებული. მალმსტრომმა საქართველოს ევროკავშირთან ვიზების ლიბერალიზაციის დიალოგის ფარგლებში შესასრულებელი სამოქმედო გეგმა გადასცა და აღნიშნა, რომ „ამ გეგმის გადმოცემა არ იქნებოდა შესაძლებელი, საქართველოს რომ არ აეღო სრული ვალდებულება ევროინტეგრაციის კუთხით. თქვენ ბრწყინვალე პროგრესს მიაღწიეთ ბევრი მიმართულებით. მე მინდა, საქართველოს ხელისუფლებას მივულოცო ეს მიღწევა. ვიზის ლიბერალიზაცია არის ძალიან მნიშვნელოვანი მიმართულება იმისთვის, რომ განმტკიცდეს ხალხთაშორისი კონტაქტები. ეს არის ხელშესახები მიმართულება. აქ არის მინიშნებული გარკვეული მოთხოვნები, რომელიც უზრუნველყოფილი უნდა იყოს, რათა შექმნას უსაფრთხო რეჟიმი და გარემო გადაადგილებითვის. ეს არის გაიდლაინი იმისთვის, რათა პროგრესი იქნეს მიღწეული კონკრეტულ მიმართულებებში. გვინდა, წავახალისოთ საქართველო, რომ გააგრძელოს რეფორმები, რაც მეტად მნიშვნელოვანია დიალოგის მიზნებიდან გამომდინარე, მაგრამ, ასევე, მნიშვნელოვანია საქართველოს საზოგადოების მოდერნიზაცია. ეს გაიდლაინები ზოგი უკვე შესრულებულია საქართველოს მხრიდან, არის მიმართულებები დარჩენილი, სადაც ბევრია გასაკეთებელი. ჩვენ მივესალმებით ხელისუფლების ვალდებულებას, განახორციელოს ეს სამუშაო ევროპასთან თანამშრომლობით“.
ამასთან, ევროკომისრის თქმით, გეგმის განხორციელების ვადებზე საუბარი ჯერჯერობით ძნელია. „ძალიან ძნელია იმაზე საუბარი, რა პერიოდი დასჭირდება ამას, ბევრი არის დამოკიდებული საქართველოს ხელისუფლებაზე და მათ ტემპზე. მაგრამ ისინი აკეთებენ ყველაფერს და ვეროკავშირის მხრიდანაც ყველანაირი დახმარება არის გაწეული. ჩვენ ამგვარი სამუშაო ჩატარებული გვაქვს ბევრ ქვეყანასთან. მაშინ, როდესაც ყველა კრიტერიული იქნება დაკმაყოფილებული, გადავალთ მეორე ეტაპზე და ამის შემდეგ შეთანხმების მიღწევაზე ვიზის ლიბერალიზაციის კუთხით, ევროკავშირი მიიღებს ამ გადაწყვეტილებას მაშინ, როდესაც საქართველო ყველა ზემო აღნიშნულ კრიტერიუმს დააკმაყოფილებს“, – განაცხადა მალმსტრომმა. 
