სამართალი
„ხოხბებზე ნადირობა“ ქართულად
საქართველო, 21 თებერვალი, საქინფორმი. შეიქმნა საიმონ ვაიზენტალის ქართული ფონდი, რომელიც 1988 წლის პირველი ნოემბრიდან 2012 წლის პირველ ოქტომბრამდე საქართველოს მოქალაქის წინაშე ჩადენილ დანაშაულებებთან მიმართებაში საეჭვო განაჩენებს გადასინჯავს.ინფორმაცია ამის შესახებ სოციალურ ქსელებში ვრცელდებოდა, ტელეკომპანიებმა კი ახლახან გაავრცელეს, თუმცა ფონდის დაარსების შესახებ ფონდის ერთ-ერთმა დამფუძნებელმა მირიან ყარაულაშვილმა ეს ინფორმაცია ორი კვირის წინ ექსკლუზიურად მიაწოდა „ობიექტივის“ ღამის სტუდიას. პირდაპირ ეთერში სატელეფონო ჩართვისას მან განაცხადა, რომ თუ ხელისუფლება ვერ ან არ ატარებს ქვეყანაში სამართლიანობის აღსადგენ ღონისძიებებს, ფონდი იზრუნებს, რომ სამართლებრივ ჩარჩოებში არცერთი დამნაშავე არ დატოვოს დაუსჯელი, ვისაც ზემოაღნიშნული დროის მონაკვეთში საქართველოს მოქალაქის წინაშე დანაშაული აქვს ჩადენილი და ამჯერად საზღვარგარეთაა გაქცეული.
ყარაულაშვილის განცხადებით, თუ საქართველოს მოქალაქის წინაშე დანაშაულის ჩამდენი „არ იქნება გასამართლებული კანონთან შესაბამისობაში და მათთვის მისჯილი სასჯელი არ იქნება საზოგადოებისთვის დამაკმაყოფილებელი, ჩვენი ფონდი იღებს ვალდებულებას, რომ ეს დამნაშავე პირი იქნება დასჯილი კანონთან შესაბამისობაში ყველა შესაძლო ხერხის, გზის გამოყენებით“.
ცნობისათვის: საიმონ ვაიზენტალმა მეორე მსოფლიო ომის შემდგომ პერიოდში ჩამოაყალიბა და სათავეში ჩაუდგა მოძრაობას, რომელიც ფაშისტური ხელისუფლების წარმომადგენლებზე ნადირობდა. გერმანული ფაშიზმის გასამართლების შემდეგ მთელ მსოფლიოში დაიწყო „ხოხბებზე ნადირობა“ – საკონცენტრაციო ბანაკების ჯალათებს ყველგან ეძებდნენ, პოულობდნენ და ასამართლებდნენ.
