საქართველო, 14 თებერვალი, საქინფორმი. საზოგადოება „ერეკლე მეორეს“ თავმჯდომარე არჩილ ჭყოიძე სახიფათოდ მიიჩნევს საქართველოს პრეზიდენტ მიხეილ სააკაშვილისა და მისი პარტია „ნაციონალური მოძრაობის“ წარმომადგენელთა განცხადებებს რუსეთთან მიმართებაში. ამის შესახებ ჭყოიძემ ИА REGNUM-ს განუცხადა. მისი თქმით, სააკაშვილი ბოლო ხანს სულ უფრო ხშირად მოუწოდებს რუსეთისგან დისტანცირებისკენ, ხოლო „ნაციონალური მოძრაობის“ წევრები რუსეთთან ურთიერთობებში ნებისმიერი დათბობის დაუშვებლობაზე ლაპარაკობენ. ეს კი საქართველოსა და ქართველი ხალხის ინტერესებს ეწინააღმდეგება.

„აშშ-ის, ევროკავშირისა და ნატოს მაღალჩინოსნების მიერ ბოლოხანს გაკეთებული განცხადებების მიხედვით ისინი საქართველოს რუსეთთან ურთიერთობების მოწესრიგებისა და მოლაპარაკებებისკენ მოუწოდებენ. დავით ბაქრაძე კი აცხადებს, რომ საქართველომ არ უნდა მისცეს უფლება ევროპას, რუსეთის მიმართ რბილი პოზიცია დაიკავოს. ეს უპასუხისმგებლო განცხადებაა, რადგან წინა ხელისუფლება 8 წლის განმავლობაში დაკავებული იყო იმით, რომ ევროპას რუსეთის წინააღმდეგ აგულიანებდა და შედეგი თვალსაჩინოა – აფხაზეთი და სამაჩაბლო დავკარგეთ, რუსეთს კი დღეს უფრო მჭიდრო და ურთიერთხელსაყრელი კავშირები აქვს ევროკავშირსა და ნატოსთან. იმ უდიდესი სამხედრო-პოლიტიკური კრახის შემდეგ, რომელიც წინა ხელისუფლების წყალობით 2008 წლის აგვისტოში საქართველოს თავს დაატყდა, ძველ ხელისუფლებას არაფერი აქვს სათქმელი საგარეო პოლიტიკურ კურსზე ან მიმართულებებზე, რადგან მათი პოლიტიკური სტაგნაცია სახეზეა, ქართველ ხალხს კი რაიმე მსგავსის გამეორება არ სურს. ყოფილ ხელისუფლებას ეტყობა, დაავიწყდა, რომ ცხინვალში საკუთარ მოსახლეობას ბომბავდა“, – აღნიშნა არჩილ ჭყოიძემ.