სამართალი
მამუკა ახვლედიანი დაკითხვაზე იმყოფება
საქართველო, 12 თებერვალი, საქინფორმი. ამჟამად ფინანსთა სამინისტროს საგამოძიებო სამსახურში მოწმის სახით თბილისის საკრებულოს თავმჯდომარის პირველი მოადგილე მამუკა ახვლედიანის დაკითხვა მიმდინარეობს. „თბილსერვისის“ საქმესთან დაკავშირებით მას უკვე მეოთხედ დაკითხავენ. საკითხი ხსენებულ კომპანიაში „ნაციონალური მოძრაობის“ 700-ზე მეტი აქტივისტის დასაქმებას ეხება. ახვლედიანის თანაგუნდელები მის დაკითხვას პოლიტიკურ ზეწოლად აფასებენ.
დაკითხვის დაწყებამდე ახვლედიანმა ჟურნალისტებთან საუბრისას განაცხადა, რომ მთავრობა იმაზე კი არ უნდა ფიქრობდეს, როგორ გამოიძახოს დაკითხვაზე თბილისის საქალაქო სამსახურის უფროსები, სხვადასხვა სტრუქტურული ერთეულის თანამშრომლები, საკრებულოს დეპუტატები, არამედ იზრუნოს სამუშაოდ ადგილების შექმნასა და მოქალაქეების დასაქმებაზე.
„შესაძლებლობა რომ ყოფილიყო, არა 750, არამედ 750 000 ადამიანს დავასაქმებდით, რადგან უამრავი პრობლემა მოეხსნებოდა ამით ჩვენს საზოგადოებას“, – განაცხადა მამუკა ახვლედიანმა.
