საქართველო, 8 თებერვალი, საქინფორმი. დღეს, 8 თებერვალს, 18:00 საათზე, საქართველოს პრეზიდენტი მიხეილ სააკაშვილი მოსახლეობას ეროვნული ბიბლიოთეკიდან მიმართავს. მისი გამოსვლა ქართული ტელევიზიების პირდაპირი ეთერით გადაიცემა. მიხეილ სააკაშვილი საზოგადოების წინაშე იმ მიმართვით წარდგება, რომლითაც უმაღლეს საკანონმდებლო ორგანოში უნდა გამოსულიყო. ამის შესახებ პრეზიდენტის პრესსპიკერმა მანანა მანჯგალაძემ გუშინ, 7 თებერვალს, გამართულ ბრიფინგზე განაცხადა.

„იმის გათვალისწინებით, რომ პრემიერ-მინისტრის მოთხოვნით, უმრავლესობამ უარი განაცხადა პარლამენტში საქართველოს პრეზიდენტის კონსტიტუციით გათვალისწინებული ყოველწლიური ანგარიშის მოსმენაზე, მიხეილ სააკაშვილმა მიიღო გადაწყვეტილება, საზოგადოებას ხვალ ეროვნული ბიბლიოთეკიდან მიმართოს“, – აღნიშნა პრესსპიკერმა.

აღნიშნულ ღონისძიებას დაესწრებიან საქართველოში აკრედიტებული დიპლომატიური კორპუსი, საპატრიარქო, მედიასაშუალებებისა და საზოგადოების წარმომადგენლები, სტუდენტები. მიმართვის შემდეგ საქართველოს პრეზიდენტი შეკითხვებსაც უპასუხებს.

საქინფორმის მკითხველს შევახსენებთ, რომ საქართველოს პრეზიდენტი მიხეილ სააკაშვილი მოხსენებით დღეს პარლამენტში უნდა გამოსულიყო, თუმცა, საპარლამენტო უმრავლესობამ ამაზე უარი განაცხადა.