საქართველო, 7 თებერვალი, საქინფორმი. კრიმინალური ავტორიტეტის, როვშან ჯანიევის (როვშან ლენკორანსკი), ძმა ემილ ჯანიევი უგულებელყოფს გავრცელებულ ხმებს იმის თაობაზე, თითქოს როვშანი სტამბულში მოკლეს. „ჩემი ძმა ცოცხალია, რამდენიმე საათის წინ ტელეფონით ვესაუბრე. ის ახლა დუბაიში ისვენებს და არავინ თავს არ დასხმია. აღმაშფოთებელია, რასაც პრესაში წერენ. რატომ არავინ ფიქრობს იმაზე, როგორი წასაკითხია ეს მისი დედის, შვილების, ნათესავებისათვის, საერთოდ, რატომ წერენ სიცრუეს?“ – განაცხადა ემილ ჯანიევმა.

„კანონიერი ქურდის“ ძმა, ასევე, ირწმუნება, რომ მოსკოვში ქურდული სამყაროს „პატრიარქის“, დედ ჰასანის, მკვლელობაში როვშანის ხელი არ ურევია. „როვშანს არავითარი კავშირი არ აქვს ასლან უსოიანის სიკვდილთან და ეს კარგად იციან პატივცემულმა ადამიანებმა“, – განაცხადა ემილ ჯანიევმა, რომელსაც მიაჩნია, რომ ეს ყველაფერი პოლიციის შეთხზულია, რომელსაც თავისი გარკვეული მიზნები აქვს და განგებ ძაბავს ვითარებას. „მათვე გამოიგონეს როვშანის ნაცნობი რუფატ ნასიბოვის (რუფო განჯანსკი) მკვლელობაც, რომელიც თითქოსდა მისივე სახლთან ჩაცხრილეს, გვამი მანქანის საბარგულში ჩადეს და სადღაც წაიღეს. იგი ცოცხალი და საღ-სალამათია“, – აცხადებს „კანონიერი ქურდის“ ძმა.