საზოგადოება
ცხინვალში მოსახლეობას იარაღის ჩაბარება მოსთხოვეს
საქართველო, 30 იანვარი, საქინფორმი. ცხინვალის რეგიონის მოსახლეობას ხელისუფლება მათ ხელთ არსებული იარაღის ნებაყოფლობით ჩაბარებას სთხოვს და ამისათვის ვადას – 2013 წლის 1 მარტამდე – უწესებს.
ცხინვალის შსს-ის განცხადებით, ამ ვადაში იარაღის ნებაყოფლობით ჩამბარებელი პირები სისხლის სამართლის პასუხისგებაში არ მიეცემიან. 1-ლი მარტის შემდეგ კი უწყება სარეიდო ღონისძიებებს გაატარებს მოქალაქეთა საკუთრებაში არსებული შეიარაღების გამოსავლენად. რეიდის შედეგად იარაღის აღმოჩენის შემთხვევაში მოქალაქეები კანონმდებლობით გათვალისწინებულ პასუხისგებაში მიეცემიან.
არსებული ცნობებით, დღეისათვის მოსახლეობის ხელში დიდი რაოდენობით იარაღია, რაც განსაკუთრებით შესამჩნევი იყო ახალი წლის ღამეს. ამ საკითხთან დაკავშირებით შეშფოთება გამოთქვა ლეონიდ თიბილოვმა და შსს-ს მოუწოდა, იარაღის ამოსაღებად გადამჭრელ ზომებს მიმართოს.
