საქართველო, 30 იანვარი, საქინფორმი. გუშინ, 29 იანვარს, მინსკში, რფ-ის საგარეო საქმეთა სამინისტროს დსთ-ის ქვეყნების პირველი დეპარტამენტის დირექტორმა მიხაილ ევდოკიმოვმა განაცხადა, რომ საქართველოს ახალ ხელისუფლებასთან მოლაპარაკებები მიმდინარეობს დსთ-ში საქართველოს დაბრუნების თაობაზე, თუმცა ეს მხოლოდ ამ ქვეყნის ხელმძღვანელობის თანხმობით უნდა მოხდეს.

„საქართველო დსთ-დან არავის გაურიცხავს, ეს ამ სახელმწიფოს გადაწყვეტილება იყო“, – აღნიშნა ევდოკიმოვმა და დასძინა, რომ საქართველოს ხელისუფლებასთან უკვე დაწყებულია კონტაქტები ამ საკითხზე.

თავის მხრივ, ევდოკიმოვის განცხადების პასუხად, საქართველოს პარლამენტის თავმჯდომარე დავით უსუფაშვილმა კიდევ ერთხელ ხაზგასმით დააფიქსირა საქართველოს პოზიცია იმის თაობაზე, რომ ქვეყანა დსთ-ში დაბრუნებას არ გეგმავს. უსუფაშვილის თქმით, ეს საკითხი განხილვის დონეზეც არ წამოჭრილა.

„კიდევ ერთხელ გეუბნებით, ქართველი ხალხის არჩევანია ევროპული ინტეგრაცია. ქართველი ხალხის სურვილია დამოუკიდებელ და სუვერენულ სახელმწიფოში ცხოვრება. ქართველი ხალხის სურვილი იყო საბჭოეთიდან თავის დაღწევა. მე არ ვიცი, ამ ქვეყანაში თუ სხვა ხალხის ჩამოსახლებას აპირებს ვინმე, რომ მერე ისინი შეუერთდნენ რამეს“, – განაცხადა დავით უსუფაშვილმა.