საქართველო, 25 იანვარი, საქინფორმი. საქართველოს პრემიერ-მინისტრი ბიძინა ივანიშვილი იმედოვნებს, რომ დავოსში მისი შეხვედრა რფ-ის მთავრობის ხელმძღვანელ დიმიტრი მედვედევთან უკანასკნელი არ იყო. ამის შესახებ ინფორმაციას რუსული მედია ავრცელებს. „შეხვედრა ხანმოკლე იყო, ჩვენ მხოლოდ გავიცანით ერთმანეთი, ხელი ჩამოვართვით და სულ ეს იყო“, – განაცხადა ივანიშვილმა მსოფლიო ეკონომიკური ფორუმის 43-ე სესიის მიმდინარეობისას და დასძინა, რომ „არავითარი საკითხი არ წამოჭრილა“.

ამასთან, პრემიერი აღნიშნავს, რომ მომავალი შეხვედრების თაობაზე ისინი არ შეთანხმებულან, რაც არ ნიშნავს, რომ ეს შეხვედრები არ შედგება.

„კონკრეტული გეგმები, რომ ჩვენ ხვალ-ზეგ კიდევ შევხვდებით, არ არსებობს. არის რუსეთთან ურთიერთობების აღდგენის სტრატეგიული გეგმა. ჩვენ ვალდებული ვართ და ყველაფერს გავაკეთებთ, რომ ამას მივაღწიოთ. შესაბამისად, მე დიდი იმედი მაქვს და მჯერა, რომ იქნება შეხვედრებიც და ურთიერთობებიც“ , – აღნიშნა ივანიშვილმა.