უცხოეთი
რუსეთის დელეგაციამ სააკაშვილის „ტრიუმფი“ ჩაშალა
საქართველო, 22 იანვარი, საქინფორმი. სტრასბურგში, სადაც გუშინ, 21 იანვარს, ევროსაბჭოს საპარლამენტო ასამბლეის ზამთრის სესია გაიხსნა, 2004 წლის შემდეგ პირველად და საქართველოს პრეზიდენტის სტატუსით ბოლოჯერ გამოვიდა სიტყვით მიხეილ სააკაშვილი. მისი გამოსვლის უმთავრესი ნაწილი საქართველო-რუსეთის პრობლემატიკას მიეძღვნა. სააკაშვილმა მოსკოვს ურჩია, „უარი თქვას იმპერიულ ზრახვებზე“, მისი დიპლომატიის მეთოდებს „უღირსი“ უწოდა და საპარლამენტო ასამბლეას მადლობა გადაუხადა მიღებული რეზოლუციების გამო, სადაც ევროპარლამენტარებმა რუსეთს მოუწოდეს, უარყოს აფხაზეთისა და სამხრეთ ოსეთის აღიარება.
ამასთან, სააკაშვილმა აღნიშნა, რომ საქართველოს ხელისუფლება არასოდეს გამოსულა რუსი საზოგადოების წინააღმდეგ და ამ ქვეყანასთან, რუსეთისგან განსხვავებით, უვიზო რეჟიმი აქვს.
სესიის გახსნის წინ სააკაშვილმა, ასევე, განაცხადა, რომ მოსკოვი „განწირულია“ მის პარტია „ნაციონალურ მოძრაობასთან“ კონტაქტისთვის, რომელიც პოლიტიკიდან არსადაც არ მიდის და საქართველოში კიდევ დიდხანს იმოქმედებს.
რუსეთის დელეგაციამ სააკაშვილის გამოსვლა პროპაგანდისტულად მიიჩნია. „სიტყვა პოლიტიკურად გათვლილი იყო“, – განაცხადა დელეგაციის ხელმძღვანელმა, სახელმწიფო დუმის საერთაშორისო საქმეების კომიტეტის ხელმძღვანელმა ალექსეი პუშკოვმა და აღნიშნა, რომ საქართველოს პრეზიდენტი „კარგი ინგლისურით, საშუალო ფრანგულითა და მშვენიერი რუსულით“ ლაპარაკობდა. თუმცა, მან პასუხი არ გასცა კითხვებს, რომლებიც საქართველოში ადამიანთა უფლებების დარღვევას ეხებოდა. „თუ სააკაშვილს მიაჩნია, რომ მისი გამოსვლა ევროსაბჭოს საპარლამენტო ასამბლეაზე ტრიუმფალური იქნება, არა, არ გამოუვა“, – განაცხადა პუშკოვმა.
