საქართველო, 22 იანვარი, საქინფორმი. საქართველოს პრეზიდენტი მიხეილ სააკაშვილი ევროსაბჭოს საპარლამენტო ასამბლეის პრეზიდენტ ჟან-კლოდ მინიონს შეხვდა. შეხვედრის მთავარი თემები ქვეყნის დემოკრატიული განვითარების პროცესში ევროპარლამენტთან თანამშრომლობის გაღრმავების როლი და რუსეთთან მიმართებაში მიღებული რეზოლუციების მნიშვნელობა იყო. საუბრისას  ჟან-კლოდ მინიონმა კიდევ ერთხელ აღნიშნა, რომ აუცილებელია ასამბლეის მიერ მიღებული იმ რეზოლუციების  გათვალისწინება, რომლებიც საქართველოს ტერიტორიების დეოკუპაციასა და ჰუმანიტარული პრობლემების მოგვარებას შუწყობს ხელს.

საქართველოს პრეზიდენტმა ევროსაბჭოს გენმდივან ტორბიონ იაგლანდთან გამართულ შეხვედრაზე მიმდინარე პოლიტიკური მოვლენები და სამომავლო ურთიერთობები განიხილა. საუბარი იმ რისკებსაც შეეხო, რომელიც ახალი მთავრობის მოსვლის შემდეგ ქვეყნის საგარეო კურსის შესაძლო  ცვლილებებს უკავშირდება..

გუშინვე მიხეილ სააკაშვილი ევროპის საბჭოს ადამიანის უფლებათა დაცვის კომისარ ნილს მუზნიეკსს შეხვდა. საუბარი იმ   პროგრესს შეეხო, რომელიც ადამიანის უფლებების, რელიგიური თავისუფლების, სასამართლო რეფორმებისა  და დემოკრატიული ინსტიტუტების განვითარების კუთხით მმართველმა გუნდმა გასული წლების განმავლობაში მიაღწია. მხარეებმა შეხვედრაზე ამ პროგრესის გაგრძელების აუცილებლობის მნიშვნელობაზეც ისაუბრეს.