საქართველო, 14 იანვარი, საქინფორმი. საქართველოს მთავრობა ვეტერანთა უფლებებს საკანონმდებლო დონეზე დაიცავს. საქართველოს თავდაცვის მინისტრ ირაკლი ალასანიას განცხადებით, ვეტერანების სოციალური დაცვის უზრუნველყოფის მიზნით შექმნილი სპეციალური სამთავრობო კომისია უკვე მუშაობს, რომელიც მთავრობისთვის სპეციალურ წინადადებებს მოამზადებს. ირაკლი ალასანიას განმარტებით, მომზადდება  საკანონმდებლო ბაზა, როგორ უნდა იყოს ორგანიზებული ვეტერანთა დაცვა და როგორ უნდა მოწესრიგდეს სტრუქტურულად კანონმდებლობა, რომელიც ვეტერანთა უფლებებს გარანტირებულად დაიცავს.

სამთავრობო კომისიას ჯანდაცვის და სოციალური დახმარების საკითხთა მინისტრი დავით სერგეენკო უხელმძღვანელებს. „კომისიაში მოადგილეების დონეზე შევა ყველა დაინტერესებული უწყების წარმომადგენელი და უახლოეს პერიოდში გახდება ნათელი, რამდენად ქმედით ნაბიჯებს გადადგამს საქართველოს მთავრობა ვეტერანების, ომში დაღუპულთა და დაჭრილთა ოჯახების მოსავლელად, მათთვის იმ გარანტიების მისაცემად, რაც აუცილებელია ღირსეულ, თავმოყვარე ქვეყანას ჰქონდეს. ქვეყანა ფასდება იმით, როგორ უვლის ომში დაღუპული გმირების ოჯახებს“, – აღნიშნა ალასანიამ. მისივე განმარტებით, ვეტერანებზე ზრუნვა წელს თავდაცვის სამინისტროს ერთ-ერთი პრიორიტეტი იქნება. მათი დახმარების პროგრამა კი გულისხმობს როგორც ფინანსურ შემწეობას, ისე პენსიების ოდენობის განსაზღვრას და ამ მიმართულებით სპეციალური საკანონმდებლო წინადადებების შემუშავებას.