საქართველო, 11 იანვარი, საქინფორმი. 2013 წლის იანვარში მოსკოვს სპეციალური მისიით ეწვევა აშშ-ის პრეზიდენტ ბარაქ ობამას მრჩეველი ნაციონალური უსაფრთხოების საკითხებში თომ დონილონი. ემისარმა მასპინძლებს უნდა გააცნოს ვაშინგტონის ხედვა მოსკოვთან მიმართებაში ობამას მეორე საპრეზიდენტო ვადის მანძილზე.

დონილონს რფ-ის პრეზიდენტი ვლადიმერ პუტინი მიიღებს. შეხვედრაზე ემისარი გაახმოვანებს ობამას თვალსაზრისს იმის თაობაზე, რომ რუსეთ-ამერიკის ურთიერთობების „გადატვირთვა“ ჯერ კიდევ მოქმედებს, მიუხედავად ორ ქვეყანას შორის ურთიერთობების გაუარესებისა.

ობამას მრჩეველმა პუტინი უნდა დაარწმუნოს, რომ რუსეთმა და აშშ-მა რაც შეიძლება მეტი შეხების წერტილი უნდა იპოვონ და შეწყვიტონ ურთიერთობების გაუარესება. ასევე, დონილონი ყურადღებას მიაპყრობს იმ გარემოებას, რომ ვაშინგტონი პოსტსაბჭოთა სივრცეს თავისი საგარეო პოლიტიკის პრიორიტეტულ მიმართულებათა რიცხვს არ მიაკუთვნებს.