საქართველო, 11 იანვარი, საქინფორმი. როგორც კახეთის საინფორმაციო ცენტრი იტყობინება, ზემო ალვანის შემდეგ სტალინის ბიუსტი თელავის რაიონის სოფელ აკურაშიც აღადგინეს. როგორც აკურის მაცხოვრებლებმა კახეთის საინფორმაციო ცენტრს განუცხადეს, ბიუსტის აღდგენის შესახებ ნებართვა ადგილობრივი ხელისუფლებიდან მიიღეს.

სოფელ აკურაში სტალინის ბიუსტი 2010 წელს აიღეს. „ხალხმა არ იცოდა, ჩუმად აიღეს. იმიტომ დავაბრუნეთ, რომ ისტორიას ვერ წაშლი, კარგი იყო თუ ცუდი, ისტორიაა და ქართველი კაცი იყო. დღეს ისეთი მთავრობა გვყვავს, რომ სტალინის ძეგლი უნდა იყოს. ადრე ხალხს გამოსვლის ეშინოდა, დღეს ცოტა თავისუფლებაა, გამოვალთ და ვიტყვით, რომ იყოს ეს ძეგლი,“ – განაცხადა აკურაში მცხოვრებმა ელგუჯა ბლუიშვილმა.

2012 წლის 1 ოქტომბრის საპარლამენტო არჩევნების შედეგად ხელისუფლების შეცვლის შემდეგ, სხვადასხვა ადგილზე სტალინის ძეგლების აღდგენა დაიწყო. სტალინის ძეგლი პირველად ახმეტის რაიონის სოფელ ზემო ალვანში აღადგინეს. 2011 წლის ივნისში ფარულად აღებული ძეგლი თუშებმა 2012 წლის 25 ნოემბერს სოფლის ცენტრში დააბრუნეს და სტალინის დაბადების დღეზე, 21 დეკემბერს კი განახლებული გახსნეს.