პოლიტიკა
პრეზიდენტმა თენგიზ გუნავა სამეგრელო-ზემო სვანეთის გუბერნატორად წარადგინა
საქართველო, 11 იანვარი, საქინფორმი. საქართველოს პრეზიდენტმა მიხეილ სააკაშვილმა სამეგრელო-ზემო სვანეთის ახალი გუბერნატორის თანამდებობაზე თენგიზ გუნავა სამეგრელოში, გუბერნიაში, გამართულ შეხვედრაზე ადგილობრივი საკრებულოს წევრებსა და რწმუნებულის აპარატის ხელმძღვანელებს პირადად წარუდგინა.
შეხვედრაზე მიხეილ საკაშვილმა თენგიზ გუნავას დამსახურებებზე ისაუბრა და აღნიშა, რომ ეს არის ადამიანი, რომელსაც დიდი წვლილი მიუძღვის სამეგრელოში კრიმინალთან ბრძოლის საქმეში: „ამოიძირკვა ნარკოტიკები, წვრილმანი ქურდობები, ყაჩაღობები, სხვა დანაშაული, კონტრაბანდა. მე მას, ასევე, ვიცნობ როგორც 2008 წლის ომის ერთ-ერთ მთავარ გმირს“. ქვეყნის პირველი პირის თქმით, პრეზიდენტის რწმუნებულები რეგიონებში ის ადამიანები არიან, რომელთა საქმიანობის მთავარი მიზანია, არ მოხდეს კრიმინალური, კორუმპირებული წარსულის დაბრუნება საქართველოში, როგორც ეს ახალი მთავრობის პირობებში ხდება. შეხვედრის დასრულების შემდეგ პრეზიდენტმა ზუგდიდის ცენტრში ის ტერიტორია დაათვალიერა, სადაც არჩევნებამდე დაიწყო მშენებლობები და ახლა შეჩერებულია. მისი თქმით, სამწუხაროა ის ფაქტი, რომ სამეგრელოს განვითარება შეფერხებულია და კიდევ ერთხელ აღნიშნა, რომ ის მზადაა ქვეყნის განვითარებისკენ მიმართული ყველა ტიპის თანამშრომლობისათვის.
