საქართველო, 9 იანვარი, საქინფორმი. იუსტიციის მინისტრმა თეა წულუკიანმა ახალი მოადგილე ალექსანდრე ბურჭულაძე წარადგინა. ის სამინისტროში ეკონომიკურ მიმართულებას უხელმძღვანელებს, კურირებას გაუწევს საჯარო სამართლის იურიდიულ პირებს – მონაცემთა გაცვლის ეროვნულ სააგენტოს, იუსტიციის სახლსა და „სმარტ ლოჯიქს“.

თეა წულუკიანის განცხადებით, იუსტიციის სამინისტროში ბურჭულაძის დანიშვნა თავიდანვე გადაწყვეტილი იყო, თუმცა, თავდაცვის უწყებაში არსებული რთული ვითარების გამო იგი შეყოვნდა აღნიშნულ სამინისტროში.

მინისტრის თქმით, სწორედ ბურჭულაძის დამსახურებით გამოვლინდა ბაჩო ახალაიას მიერ დატოვებული 113-მილიონიანი დეფიციტი თავდაცვის სამინისტროს ბიუჯეტში. მან გამოავლინა „ავტომატების თემასთან“ დაკავშირებული ხარვეზები და პრეზიდენტის მეორე თვითმფრინავთან დაკავშირებული ხარჯები.