საქართველო, 8 იანვარი, საქინფორმი. როგორც საქინფორმს მშვიდობის, დემოკრატიის და განვითარების კავკასიური ინსტიტუტიდან ატყობინებენ, დღეს, 8 იანვარს, 5 საათზე ინსტიტუტის ოფისში (ა.წერეთლის გამზირი, № 72, მე-2 სართული) გაიმართება პრესკონფერენცია, რომელზეც ინსტიტუტის ხელმძღვანელობა ჟურნალისტებს გააცნობს თავის გეგმებს საქართველოში სამოქალაქო საზოგადოებისა და მედიის განვითარების პროგრამის განხორციელებასთან დაკავშირებით.

საქინფორმის მკითხველს შევახსენებთ: საქართველოს პრეზიდენტის 2012 წლის 17 დეკემბრის №1112 ბრძანებულებით, გამოცხადდა კონკურსი: „სამოქალაქო სექტორისა და თავისუფალი მედიის განვითარების ხელშეწყობის მიზნით განსახორციელებელი ღონისძიებების შესახებ“. საკონსურსო კომისია სააკაშვილის მრჩევლებით იყო დაკომპლექტებული – ეკონომიკის ექს-მინისტრ ვერა ქობალიას და საგარეო საქმეთა მინისტრის ყოფილი მოადგილე ნინო კალანდაძის შემადგენლობით.

კონკურსში ერთ-ერთ გამარჯვებულად გამოცხადდა მშვიდობის, დემოკრატიის და განვითარების კავკასიური ინსტიტუტი («CIPDD“ – დირექტორი, ცნობილი ნაციდეოლოგი გია ნოდია), რომელსაც 800 ათასი ლარი მიენიჭა პრეზიდენტის სარეზერვო ფონდიდან შესაბამისი პროგრამების განსახორციელებლად.

ამ მიზნისათვის პრეზიდენტის სარეზერვო ფონდიდან სულ 1 მლნ ლარი გამოიყო. კონკურსში მონაწილე ოთხი ორგანიზაციიდან დაფინანსება 200 ათასი ლარის ოდენობით მიიღო ზაზა დარასელის ჟურნალისტიკის განვითარების ფონდმა (ხელმძღვანელი ნინო დარასელი).