საქართველო, 27 დეკემბერი, საქინფორმი. შინაგან საქმეთა სამინისტროს განცხადების თანახმად, იმერეთის, რაჭა-ლეჩხუმისა და ქვემო სვანეთის სამხარეო მთავარი სამმართველოსა და ვანის რაიონული სამმართველოს თანამშრომლებმა ერთობლივად ჩატარებული ღონისძიებების შედეგად ვანის მუნიციპალიტეტის ყოფილი თავმჯდომარე, 1964 წელს დაბადებული დავით კაკაბაძე დააკავეს.

გამოძიებამ დაადგინა, რომ კაკაბაძემ  საკრებულოს თანამშრომლები, ვანის მუნიციპალიტეტის თავმჯდომარის მოვალეობის შემსრულებელი და ამავე საკრებულოს აპარატის უფროსი ყალბი დოკუმენტის დამზადებაში წააქეზა. მათ მიერ გაყალბებული ბრძანების საფუძველზე, საკრებულოს ბაზაზე არსებული მაღალი გამავლობის „ტოიოტა ჰაილუქსის“ მარკის ავტომობილი მაჟორიტარი დეპუტატის ბიუროს გადაეცა.

5 ნოემბრით დათარიღებული დოკუმენტი  სინამდვილეში 20 დეკემბერსაა შედგენილი. დავით კაკაბაძემ ვანის მუნიციპალიტეტის თავმჯდომარის თანამდებობა 9 დეკემბერს დატოვა.

სამართალდამცველებმა დანაშაულში მონაწილე ყველა პირი დაკითხეს.