საქართველო, 27 დეკემბერი, საქინფორმი. როგორც საქინფორმს საზოგადოებრივი მოძრაობა „ლაზარეს“ პრესსამსახურიდან ატყობინებენ, მოძრაობის ფორმატში იქმნება „მიხეილ სააკაშვილის, „ნაცმოძრაობისა“ და „თავისუფლების ინსტიტუტის“ მიერ გაწეული დანაშაულებრივი საქმიანობის შემსწავლელი საზოგადოებრივი კომისია“.

მოძრაობის განცხადების თანახმად, ქართველ საზოგადოებაში, რომლის საუკეთესო წარმომადგენელთა ნაწილიც მოძრაობა „ლაზარეშია“ გაწევრებული, დიდია პრეზიდენტის, ყოფილი ხელისუფლებისა და (ფაქტობრივად, ხელისუფლების დანამატად ქცეული) „თავისუფლების ინსტიტუტის“ პასუხისმგებლობის საკითხის დაყენების მოთხოვნა.

სწორედ მოძრაობა „ლაზარეს“ მრავალრიცხოვან წევრთა და მომხრეთა მოთხოვნის გათვალისწინებით, კომისია, დღეს მოქმედი პარლამენტის შესაბამის კომისიებთან თანამშრომლობითა და პროფესიონალების ჩართვით, ქვეყნისთვის ყველა საჭირბოროტო სფეროსა და მიმართულებით გამოიკვლევს ჩამოთვლილი სუბიექტების დანაშაულებრივ ქმედებებს.