საქართველო, 26 დეკემბერი, საქინფორმი. როგორც უკვე იუწყებოდა საქინფორმი, საქართველოს დელეგაცია პრემიერ-მინისტრ ბიძინა ივანიშვილის მეთაურობით ოფიციალური ვიზიტით აზერბაიჯანში იმყოფება. სააგენტო „გურია ნიუსის“ წყაროს ინფორმაციით,  პრემიერის  ვიზიტამდე ერთი დღით ადრე, ბაქოში თბილისის მერი გიგი უგულავა და პარლამენტარი რამაზ ნიკოლაიშვილი გაემგზავრნენ.

სააგენტოს ცნობით, ისინი აზერბაიჯანის დედაქალაქში ყატარის ავიახაზებით 15:05 საათზე გაფრინდნენ. ქალაქის მერიც და ინფრასტრუქტურის ყოფილი მინისტრი ეკონომკლასში ისხდნენ. სავარაუდოდ, არც ერთ და არც მეორე ჩინოვნიკს იმის ფინანსური პრობლემები არ უნდა ჰქონოდა, რომ ბიზნესკლასით არ ემგზავრათ. როგორც ჩანს, მათ სურდათ შეუმჩნევლად დარჩენილიყვნენ.

სააგენტოს წყაროს ცნობით, „რამაზ ნიკოლაიშვილს კიდევ ერთი მამაკაცი ახლდა. სავარაუდოდ, ახლდათ დაცვის თანამშრომელიც. მათ ტრაპთან დახვდნენ ტრაფარეტით – მათი გვარების გამომსახველი ფურცლით, ჩასვეს მანქანაში და გაიყვანეს VIP გასასვლელიდან.... ყველა მათგანმა ერთი მანქანით დატოვა ბაქოს აეროპორტი“.