საქართველო, 26 დეკემბერი, საქინფორმი. სომხეთი დაინტერესებულია აფხაზეთის რკინიგზის გახსნით. ამის შესახებ დახურული სააქციო საზოგადოება „სამხრეთ კავკასიის რკინიგზის“ გენერალურმა დირექტორმა ვიქტორ რებეცმა განაცხადა.

„ჩვენთვის უაღრესად მნიშვნელოვანია, რომ ეს თემა საქართველოს ოფიციალური პირების განხილვის საგანი გახდა და არსებობს რუსეთის პოზიციაც. აუცილებელია დაახლოების პოლიტიკა და საკითხის გადაჭრასაც შევძლებთ“, – აღნიშნა რებეცმა ერევანში გამართულ პრესკონფერენციაზე და დასძინა, რომ ტექნიკური პარამეტრების თვალსაზრისით, ამ სარკინიგზო მიმოსვლის გასახსნელად პრაქტიკულად არავითარი დაბრკოლება არ არსებობს, ერთი ხიდის აღდგენის გარდა, დანარჩენი ინფრასტრუქტურა კი ნორმალურ მდგომარეობაშია.

საქინფორმის მკითხველს შევახსენებთ: მიმდინარე წლის ოქტომბრის ბოლოს საქართველოს რეინტეგრაციის მინისტრმა პაატა ზაქარეიშვილმა განაცხადა, რომ საქართველოს ხელისუფლება მზადაა, რუსეთთან სარკინიგზო მიმოსვლა აღადგინოს „აფხაზეთის დეიზოლაციის სტრატეგიის“ ფარგლებში.

აფხაზეთის რკინიგზის ამოქმედება რეალისტური იქნება, თუკი რუსეთი საქართველოს ახალ ხელისუფლებასთან ურთიერთობების განვითარებას მოისურვებს.

აფხაზეთ-საქართველოს რკინიგზის მონაკევეთის აღდგენა სომხეთისთვის სტრატეგიულად მნიშვნელოვანია, რადგან ეს ყველაზე მოკლე და იაფი გზაა რუსეთისკენ.