საქართველო, 24 დეკემბერი, საქინფორმი. პრემიერ-მინისტრმა ბიძინა ივანიშვილმა „შერატონ მეტეხი პალასში“  პრესკონფერენცია გამართა. შეხვედრისათვის აკრედიტაცია 150 ჟურნალისტმა გაიარა. პრემიერ-მინისტრის რანგში ბიძინა ივანიშვილი მედიის წარმომადგენლებს მეორედ შეხვდა.

საქართველოს პრემიერმა კომენტარი გააკეთა ბელარუსის პრეზიდენტ ალექსანდრე ლუკაშენკოს განცხადებაზე იმის შესახებ, რომ იგი მზადაა, საქართველოს დაუჩოქოს და დსთ-ში დაბრუნება სთხოვოს. პრემიერის განმარტებით, მსგავსი საკითხი არ განიხილება.

„დსთ-ში დაბრუნების მსგავსი არაფერი განიხილება, მაგრამ განიხილება ის, რომ ჩვენს ყველა მეზობელ და მეგობარ ქვეყანასთან, რომელიც დსთ-ის წევრია, გავამყაროთ ურთიერთობები. ამისთვის ნებისმიერ ფორმას გამოვიყენებთ, რომელიც ხელს არ შეუშლის ჩვენს სტრატეგიას – ევროპულ ინტეგრაციას“, – აღნიშნა ივანიშვილმა.

პრემიერი შეეხო დავოსში რფ-ის პოლიტიკურ ხელმძღვანელებთან შეხვედრის შესაძლებლობასაც და განაცხადა, რომ გამორიცხული არაფერია, თუმცა, ჯერ საამისო მზაობა არ არის.