საქართველო, 18 დეკემბერი, საქინფორმი. პოლიტიკური პატიმრის სტატუსის მისაღებად „ქართული პარტიის“ დაპატიმრებული წევრების მოთხოვნას და შიმშილობის აქციას ირაკლი ოქრუაშვილიც უერთდება. თავდაცვის ყოფილი მინისტრის გადაწყვეტილებას მისი ადვოკატიც ადასტურებს. მამუკა ჭაბაშვილის განცხადებით, ოქრუაშვილი პოლიტდევნილთა სიიდან ამოღებულ იქნა მათთვის გაუგებარი მიზეზით, და მისი დაცვის ქვეშ მყოფი სამართლიანობის აღდგენას მოითხოვდა, წინააღმდეგ შემთხვევაში, შიმშილობას დაიწყებდა. ადვოკატის განმარტებით, ოქრუაშვილმა ამ ნაბიჯით მოშიმშილე თანამესაკნეს სოლიდარობა გამოუცხადა.

საქინფორმის მკითხველს შევახსენებთ, რომ 19 დეკემბრის საკომიტეტო მოსმენაზე პოლიტპატიმართა და პოლიტდევნილთა სტატუსის მინიჭების საკითხს განიხილავენ.

პარლამენტის ადამიანის უფლებათა დაცვის კომიტეტის თავმჯდომარე ეკა ბესელია აცხადებს, რომ „ოქრუაშვილი იყო დევნილთა სიაში, მაგრამ არ დაელოდა პარლამენტის მიერ მისაღებ გადაწყვეტილებას. მისმა ადვოკატმა, ბატონმა კორძაძემ განაცხადა, რომ იგი არ აპირებს, ისარგებლოს პოლიტდევნილის სტატუსით“. განსახილველ პირთა შესახებ კი ამბობს, რომ როცა რამდენიმეს საპროცესო შეთანხმება აქვს გაფორმებული და დანაშაული – აღიარებული, ეს ურთიერთსაწინააღმდეგო პოზიციაა.