სამართალი
გირგვლიანის საქმის გამოძიება წლის ბოლომდე დასრულდება
საქართველო, 14 დეკემბერი, საქინფორმი. სანდრო გირგვლიანის მკვლელობის საქმის ხელახალი გამოძიება შესაძლოა, წლის ბოლომდე დასრულდეს. ამის შესახებ ტელეკომპანია „მე-9 არხის“ გადაცემაში – „მთავარი კითხვა“ – საქართველოს მთავარმა პროკურორმა არჩილ კბილაშვილმა განაცხადა.
მისივე თქმით, გამოძიებამ მნიშვნელოვნად წაიწია წინ ხმაურიან, მათ შორის, გირგვლიანის, რობაქიძის, ზურაბ ჟვანიას, 26 მაისის მოვლენების საქმეებშიც, თუმცა ამ ეტაპზე მთავარმა პროკურორმა დეტალებისა და კონკრეტიზაციისგან თავი შეიკავა.
სასამართლოსთან დაკავშირებით კი კბილაშვილმა განაცხადა, რომ დღეს სასამართლო სავსებით დამოუკიდებელია პროკურატურისგან და ახალი მთავრობის ფორმირების შემდეგ სასამართლო გადაწყვეტილებები ძირეულად განსხვავდება წინა ხელისუფლების პირობებში მიღებული გადაწყვეტილებებისგან.
