საქართველო, 14 დეკემბერი, საქინფორმი. NDI-ის კვლევას „წინააღმდეგობის მოძრაობის“ თავმჯდომარე დავით თარხან-მოურავი ეხმაურება. მისი განცხადებით, საარჩევნო წლის დასაწყისში სააკაშვილს ამომრჩევლის მხოლოდ 13% უჭერდა მხარს, მაგრამ აგვისტოსთვის სააკაშვილის რეიტინგმა 24%-მდე მოიმატა. რაც შეეხება ივანიშვილს, მისი მხარდაჭერა წლის განმავლობაში 52-62%-შორის მერყეობდა.

„ობიექტივს“ ამ კვლევის შედეგები არაერთხელ გაუსაჯაროებია. ამგვარად, ბიძინა ივანიშვილი (ნებისმიერ შემთხვევაში) უგებდა სააკაშვილს, მაგრამ სააკაშვილი არჩევნებს უდავოდ გააყალბებდა და დასავლეთი, სამწუხაროდ, მას მხარს დაუჭერდა.

„რა შეცვალა ე.წ. ციხის კადრებმა? პირველ რიგში, სააკაშვილის რეიტინგი კვლავ 13-14%-მდე დავიდა, ხოლო ბიძინა ივანიშვილის რეიტინგმა 70%-ს გადააჭარბა. თუმცაღა, ამას გადამწყვეტი მნიშვნელობა არ ჰქონდა. ივანიშვილი მაინც უსწრებდა სააკაშვილს. მთავარი, რაც შეცვალა ციხის კადრებმა, ისაა, რომ სააკაშვილმა ვეღარ გაბედა არჩევნების მასობრივი გაყალბება და, შესაბამისად, სააკაშვილის ლობისტებმა ვეღარ გაბედეს რეჟიმის ღია მხარდაჭერა.

ამიტომაც ბიძინა ივანიშვილს ბევრი ხმა ვეღარ მოჰპარეს და 62-63% მაინც დაუწერეს. სააკაშვილმა კი ხმები კვლავ მოიპარა და 13%-ის ნაცვლად, 40%-ზე ცოტა მეტი დაიწერა, ანუ კადრები რომ არ ყოფილიყო, სააკაშვილი არჩევნებს გააყალბებდა და 70%-ს დაიწერდა“, – აღნიშნა „წინააღმდეგობის მოძრაობის“ თავმჯდომარე დავით თარხან-მოურავმა.