საქართველო, 13 დეკემბერი, საქინფორმი. საქართველოს სტრატეგიული კვლევების ინსტიტუტისა და შვედეთის საელჩოს ორგანიზებით საპარლამენტო უმცირესობა „ნაციონალური მოძრაობიდან“ ევროპის რამდენიმე ქვეყნის წარმომადგენლებს შეხვდა, მათ შორის, შვედეთისა და ბულგარეთის საგარეო საქმეთა მინისტრებს – კარლ ბილდტსა და ნიკოლაი მლადენოვს, პოლონეთის პრეზიდენტის ადმინისტრაციის უფროს იასეკ მიხალოვსკის. შეხვედრას არასამთავრობო სექტორის წარმომადგენლებიც ესწრებოდნენ. განხილვის მთავარი თემები საქართველოში არსებული პოლიტიკური სიტუაცია და ევროინტეგრაციის პროცესი იყო.

„ნაციონალური მოძრაობის“ გენერალურმა მდივანმა ვანო მერაბიშვილმა ისაუბრა ახალი ხელისუფლების მიერ ზეწოლებზე. მან ამ ფონზე ყურადღება გაამახვილა მმართველი პარტიის მიერ არჩევნებში დამარცხების აღიარების მნიშვნელობაზე და აღნიშნა, რომ „საქართველომ არ უნდა დაკარგოს უნიკალური შანსი – ქვეყანაში შენარჩუნდეს და გაღრმავდეს დემოკრატია და ოპოზიციურ პარტიებს მიეცეთ სრულფასოვანი ფუნქციონირების საშუალება“. მისი თქმით, ოპოზიციას სურს, რომ ხელისუფლებამ დაუპირისპიროს იდეები, დაპირებების ასრულება და არა პროკურატურაში დაბარება.

შვედეთის საგარეო საქმეთა მინისტრი კარლ ბილდტი აღნიშნავს, რომ ქვეყანაში ახალი პოლიტიკური სიტუაციის პირობებში უნდა გაგრძელდეს საქართველოსთან ურთიერთობის განვითარება. მისი თქმით, მნიშვნელოვანია ოპოზიციასთან შეხვედრები. „ჩვენ ხაზი გავუსვით დემოკრატიული გზის გაგრძელების მნიშვნელობას, რომლის დემონსტრირებაც მოხდა არჩევნებისა და ხელისუფლების ცვლილების გზით“, – აღნიშნა ბილდტმა.