საზოგადოება
„თავისუფალი საქართველო“ რეკლამების ქართულ ენაზე განთავსებას მოითხოვს
საქართველო, 12 დეკემბერი, საქინფორმი. როგორც „თავისუფალი საქართველოს“ პრესსამსახური საქინფორმს ატყობინებს, პარტიამ პარლამენტს საკანონმდებლო წინადადებით მიმართა, რითაც „რეკლამის შესახებ“ საქართველოს კანონში ცვლილების გატარებას ითხოვს. საუბარია აღნიშნული კანონიდან მე-6 მუხლის მე-8 პუნქტის ამოღებაზე, რომელიც კომპანიებს აძლევს საშუალებას, რომ აბრაზე განათავსონ მხოლოდ ინგლისურენოვანი წარწერა.
ცნობისათვის: წარწერა არ შეიძლება ჩაითვალოს რეკლამად, თუ ის არ არის დაშორებული ამ კონკრეტული ობიექტიდან (ოფისიდან) 1,5 მეტრით მაინც.
„თავისუფალი საქართველო“ შენიშნავს, რომ „იმის მიუხედავად, რომ კანონმდებლობით საქართველოს ტერიტორიაზე რეკლამა ვრცელდება ქართულ ენაზე, კომპანიები სარგებლობენ სწორედ კანონში არსებული აღნიშნული ჩანაწერით და თბილისში არაერთ უცხოურ ოფისზე წარწერა განთავსებულია მხოლოდ უცხო ენაზე“.
